Vit hava hugt eftir hagtølum fyri, hvussu nógvar minuttir liðini geva til eykaleikararnar í Betri Deildini sama umfar í 1.deild.

Reglugerðin sigur, at eykaleikarar í Betri Deildini kunnu spæla í 1.deild sama umfar. Sjey leikarar kunnu sita á bonkinum og næstan altíð spælur besta liðið aftaná næstbesta liðið. Onkur dømi eru um, at næstbesta liðið spælir dagin eftir ella tveir dagar seinni, og tá síggja vit ofta, at tað eru nógv fleiri minuttir til eykaleikararnar í bestu deildini enn, tá næstbesta liðið spælir áðrenn.

Víkingur er liðið, sum gevur flestar minuttir til sínar eykaleikarar á næstbesta liðnum. Fyrstu 12 umførini hava eykaleikararnir sama leikumfar spælt 4510 minuttir á næstbesta liðnum sambært FaroeSoccer. Síðani kemur EB/Streymur við 3772 minuttum og har skal sigast, at í tveimum umførum hevur næstbesta liðið hjá EB/Streymi ikki spælt sama leikumfar, so har eru bara 10 leikumfør ímun til 12 hja hinum, sum hava lið í báðum teimum bestu deildunum. Nógv fæst minuttir til eykaleikarar hevur KÍ, har bara 491 minuttir eru givnir til eykaleikarar á næstbesta liðnum sama leikumfar.

Vit hava tikið HB við sum einsta felag, sum hevur sítt næstbesta lið í triðbestu deildini. Har síggja vit, at undir Adolfo Sormani var eingin eykaleikari á næstbesta liðnum yvirhøvur, men síðani André Olsen tók yvir eru nógv fleiri minuttir givnir. Fyrsta talið er tal av leikarum, sum spæla heilan dyst og síðani er tal fyri leikarar, sum spæla part av dysti fyri næstbesta liðið. Dømi: Í 1. umfari spældu fýra leikarar hjá Víkingi, sum byrjaðu á bonkinum í Betri Deildini, heilan dyst fyri næstbsta liðið sama leikumfar umframt ein, sum spældi 56 minuttir. Har fyrsta talið er hægri enn sjey er talan einans um leikarar, sum hava spælt part av dystinum. Sí talvu niðanfyri.