Tað er lagt upp til toppdyst í Sarpugerði mikudagin.

Mikudagin møtast tey bæði ovastu liðini í Betri Deildini í dysti, sum bleiv útsettur í summar. Hetta eru eisini liðini, sum vóru størstu favorittarnir at vinna FM undan kappingarárinum. Men tað var skjótt, at KÍ ikki megnaði at fylgja við og undan summarsteðginum var tað heldur HB, sum hótti Víking. Síðani HB tapti á Svangaskarði hevur Víkingur verið greitt á odda, og tað skal henda okkurt løgið, um FM ikki endar í Víkingi í ár, tí níggju stig og ein betri málúrtøka er á muni nú tey bæði ovastu liðini hava fimm dystir eftir.

Víkingur hevur eina óvanliga góða gongd. Víkingur hevur vunnið 34 av síðstu 35 dystunum, sum merkir 102 stig av síðstu 105. Einasta tapið kom í Klaksvík fyrr í ár.

KÍ hevur tapt fýra dystir í ár og hevur vunnið hinar. Tapini eru komin móti HB (2), B36 og Víkingi. Men síðani KÍ tapti 3-0 móti HB 23. juni, so hevur KÍ vunnið átta landskappingardystir á rað. KÍ hevur nú nógv fleiri tøkar leikarar enn áðrenn summarsteðgin, og tí er Víkingur neyvan nakar greiður favorittur, hóast stigatalvan kundi bent á tað. Vinnur Víkingur hendan dystin, so er tað bara uppá málmunin, at KÍ kann innheinta og har er Víkingur 28 mál betri. Síðani er tað stigametið, sum KÍ eigur í 2022 við 77 stigum. Vinnur Víkingur rest, so kemur Víkingur uppá 78 stig og tekur harvið metið. So hóast FM tykist avgjørt, so hava liðini sínar sigursrøðir og met at stríðast fyri.

Vegna ljósviðurskiftini byrjar dysturin mikudagin kl. 17.00. Dómari verður Heini Z. Viðoy.