U21-landsliðið vendi 0-1 til 2-1 seint í dystinum og fekk eina dreymabyrjan við hesum nýggja hópinum.

U21-landsliðið vann 2-1 á Estlandi í Klaksvík leygarkvøldið. Í fyrra hálvleiki hendi ikki tað stóra, men Estland hevði munin í málroyndum. Í seinna hálvleiki kom Estland tíðliga á odda eftir innlegg úr vinstru, har føroyska verjan ikki var í javnvág. Eftir hetta settu Føroyar seg tungt á dystin og trýstið økist á málið hjá Estlandi. Í 73. minutti eydnaðist, tá Jóhan Josephsen tók ímóti einari gávu frá málverjanum. Og í longdu leiktíðini bleiv innskifti Aron Benjaminsen feldur. Áki Samuelsen skoraði uppá brotssparkið og so kundu Føroyar hátíðarhalda ein flottan sigur í fyrstu royndini við hesum hópinum, har teir flestu spældu sínar fyrstu U21-landsdystir.

Talan er um eitt U21-landslið, sum hevur eina samanseting av útlendskum profilum, lyklaleikarum hjá liðum í Betri Deildini og eykaleikarum hjá topp 5 liðum í Betri Deildini umframt tveir leikarar úr 1.deild, har annar tó venur við Betri Deildarhópi. Hendan dagin var Heini Sørensen skaddur, og hann burdi fingið ein stóran leikliut á hesum U21-landsliðnum. Samansetingin sá út til at rigga væl longu í fyrsta dystinum og ofta síggja vit, at landsliðini eftir stóra útskifting mennast við tíðini. Tað er sum, at liðið hevur nakrar framúr bóltsspælarar og so er tað blanda við leikarum, sum arbeiða hart fyri liðið og vísa góðan hugburð.

Stóra stjørnan á liðnum er Áki Samuelsen, sum sum bara manglar fýra dystir til at taka metið fyri flestar U21-landsdystir fyri Føroyar. Hann byrjaði á U21-landsliðnum í 2021 og sannlíkt er, at hann er á U21-landsliðnum, tí hann har er lyklaleikari sum fær fulla spælitíð, meðan hevði hann verið ov gamal til U21, so hevði hann helst verið í A-landsliðshópinum. Blívur hann við at verða sannførandi í Obos-deildini er spurningurin, um A-landsliðið kann blíva við at lata hann verða á U21, men har skal vigast upp móti hvørjum øðrum, um full spælitíð á U21 er meira mennandi, um leiktíðin á A-landsliðnum er avmarkað. 

Yngsti leikarin á vøllinum var innskifti 17 ára gamli Aron Benjaminsen úr Kristiansund. Her síggja vit beinanvegin, at talan er um eitt heilt serligt talent eftir føroyskum mátistokki og nýggi venjarin, Ólavur Mikkelsen, skal hava stórt rós fyri at taka ein so ungan leikara við, tí tað hava vit saknað summi av undanfarnu árum. Eitt dømi er Mattias Hellisdal, sum ikki spældi sín fyrsta U21-landsdyst fyrr enn hesaferð. Aron fekk brostssparkið í yvirtíðini eftir sera hegnisligar driblingar.

U21-landsliðið er í einum sera spennandi bólki. Har eru Frakland, Sveis og Ísland, sum vit kenna fyri at hava góðar ungdómsleikarar seinnu árini, men so eru eisini Luksemborg og Estland, har Føroyar eiga at kunna gera nakað, sum eisini eydnaðist í fyrstu royndini.

Talan var eisini um fyrsta sigurin hjá U21-landsliðnum í Klaksvík, har úrslitini hava verið:

2025: Føroyar-Estland 2-1

2024: Føroyar-Portugal 1-3

2024: Føroyar-Grikkaland 0-4

2023: Føroyar-Kroiatia 2-4

2023: Føroyar-Andorra 2-2

2022: Føroyar-Serbia 1-1

2021: Føroyar-Norður Makedónia 1-1