Okkurt ár hava nógv av teimum vanligu topp 5 liðunum verið á somu síðu í lutakastinum til kappingina um løgmanssteypið, og tað hevur givið hinum møguleika at koma langt. M.a. sóu vit B68 koma í steypafinaluna í 2023 uttan at møta nøkrum topp 5 liði ávegnum. Soeliðis verður ikki í ár. Lutakastið leggur upp til, at fýra av teimum vanligu topp 5 liðnum møtast í hálvfinalunum, um ikki okkurt óvæntað úrslit hendur. Tey einastu liðini, sum kunnu møtast áðrenn, eru grannarnir úr HB og B36, sum kunnu møtast í fjórðingsfinaluni. 

Hjá kvinnum fingu verandi steypavinnarar úr HB pláss í hálvfinalunum uttan dyst.

FSF skrivar: 

Nú er greitt, hvussu liðini møtast í fyrstu umførunum í steypakappingunum hjá bæði kvinnum og monnum

Mikukvøldið var snotiliga Víkingahúsið í Sarpugerði í Norðragøtu karmur um lutakastið til fyrsta umfari í kappingini um Løgmanssteypið hjá kvinnum, og fyrsta umfar og fjórðingsfinalurnar í kappingini um Løgmanssteypið hjá monnum.

Tað var liðskiparin hjá KÍ og greipuvinnarin farna kappingarár, Jákup Biskopstø Andreasen, ið fekk heiðurin at trekkja.

Hjá kvinnum háttaði lutakastið seg soleiðis, at HB kom beinleiðis í hálvfinalurnar, meðan dystirnir í fyrsta umfari, sum verða spældir 20. og 21. mai, eru hesir: Skála – KÍ, B36 – 07 Vestur og NSÍ – Víkingur.

Hálvfinalurnar eru á skránni 22. og 23. august, og 2. og 3. septembur, meðan finalan í kappingini um Løgmanssteypið hjá kvinnum verður á Tórsvølli leygardagin 19. septembur.

Hjá monnum verður fyrsta umfar spælt 15. og 16. apríl, og tá møtast liðini soleiðis: FC Suðuroy – B36, FC Hoyvík – TB, Víkingur – AB, KÍ – ÍF, EB/Streymur – NSÍ, HB – B71, B68 – MB og 07 Vestur – Skála.

Fjórðingsfinalurnar eru á skránni 29. apríl, og tær síggja soleiðis út: HB / B71 – FC Suðuroy / B36, Víkingur / AB – FC Hoyvík / TB, B68 / MB – KÍ / ÍF og 07 Vestur / Skála – EB/Streymur / NSÍ.

Hálvfinalurnar verða spældar 13. og 14 mai, og 24. og 25. juni, meðan finalan í steypakappingini hjá monnum verður leygardagin 5. septembur.