Føroyskur fótbóltur leggur forðingar fyri sær sjálvum bæði ímun til lands- og steypakapping og ímun til møguleikarnar at avrika væl í altjóða fótbólti, tá hugsað verður um, hvussu vit leggja okkara flytingarvindeyga.

Í summar lat flytingarvindeygað í Føroyum aftur 17. juli og ongastaðni í Evropa letur tað so tíðliga aftur. Í lutfalli av dystum, sum eru eftir í landskappingini, eru tað bara Georgia og Litava, ið bæði hava klárað seg illað í altjóða fótbólti síðstu árini, sum lata fyrr aftur. Sí talvu niðast í greinini.

Feløgini ynsktu ikki broytingar

At lata flytingarvindeygað aftur so tíðliga er nakað, sum feløgini hava valt, sambært leiðaranum í kappingar- og dómaradeildini, Ásu K. Thomsen.

- Tað er ásett í leikarareglugerðini, nær flytingarvindeyguni lata upp og aftur.

Tá FIFA broytti reglurnar soleiðis, at seinna flytingarvindeygað kundi vera opið longri, tók Starvsnevndin hjá FSF málið upp í september 2023. Orsøkin var, at feløgini høvdu ymisk ynski um tíðarskeiðini, men nøkur ynsktu at seinna flytingarvindeygað skuldi vera opið longri.

Starvsnevndin umrøddi saman við feløgunum uppskot at leingja seinna tíðarskeiðið til 6 vikur. Uppskotið um at leingja summarflytingarvindeygað varð tó ikki samtykt av feløgunum, sigur Ása K. Thomsen við bolt.fo.

Tað er annars ikki nøkur forðing fyri at hava flytingarvindeygað longri opið. Fyrr var tað fýra vikur, men hetta er nú broytt av FIFA.Fyrra flytingarvindeygað kann ikki vera styttri enn átta vikur og ikki longri enn 12 vikur. Seinna flytingarvindeygað skal vera mitt í kappingarárinum og kann ikki vera styttri enn fýra vikur og ikki longri enn átta vikur. Tilsamans kunnu vindeyguni ongantíð vera opin longri enn 16 vikur.

Kann kanska broytast til 2026

Flytingarvindeygað skal ásetast í síðsta lagi 12 mánaðar, áðrenn tað verður virkið, so útfrá tí er longu ov seint at broyta nakað til 2026. Tað ber møguliga til at søkja um at fáa tað flutt eftir tað, men tað er eingin trygd fyri, at tað verður góðkent av FIFA, sigur Ása. Flytingarvindeyguni í 2026 eru ásett soleiðis:

Fyrra flytingarvindeyga 2026: 8. januar - 13. mars kl. 16:00.

Seinna flytingarvindeyga 2026: 15. juni - 14. Juli kl. 16:00

Tað merkir, at tað liggur áleið sum í ár, sum støðan er nú, um feløgini ikki gera eina roynd at fáa tað broytt. Flytingarvindeyga stongir í fyrra parti av summarsteðginum í landskappingini 2026, um kappingin liggur áleið sum hon plagar.

Einki uppskot er á borðinum í løtuni, men FSF er opið fyri at umrøða málið aftur, um feløgini ynskja tað, sigur Ása.

Selja uttan at kunna keypa

Í summar hava Víkingur, B36 og EB/Streymur merkt avleiðingarnar av, at tey missa leikarar til deildir, har flytingarvindeygað er opið uttan at kunna hava møguleikan at fáa leikarar inn ístaðin, tí flytingarvindeygað í Føroyum er stongt. Vit kunnu fáa fleiri hugsað dømi, har lið kunnu koma at selja leikarar við stórum avleiðingum. T.d. um tey spæla um niðurflyting, altjóða pláss ella FM. Ein kann siga, at leikararnir hava sáttmálar og eru bundnir, men summir hava eisini klasular/avtalur um, at sleppa avstað, um t.d. útlendskur áhugi er. Og tá verður kanska ikki spurt eftir, um føroyska flytingarvindeygað er opið.

Ávirkar møguleikarnar í altjóða fótbólti

Í altjóða fótbólti kann eitt so skeivt flytingarvindeygað hava stórar avleiðingar. Tí meðan kappinganeytin ofta kann styrkja um hópin allan vegin fram til play-off síðst í august, so kunnu føroysku liðini bara missa leikarar hetta tíðarskeiðið, tí um hálvan juli verður 1. umfar vanliga spælt og um at verða liðugt. Eingin fær heldur lagt nakra ætlan til rættis, tí hálvan juli veit eingin, um mann er í einum deildarspæli og fær yvir 40 milliónir at arbeiða við ella um ein verður útsligin í 2. umfari og hevur fimm-átta milliónir at arbeiða við.

ECA-skipanin, har øll feløgini fáa pengar eftir, hvussu føroysku liðini klára seg í altjóða fótbólti, kann blíva rakt av hesum, og tá koma øll feløgini at missa inntøkur. Føroyar liggja í løtuni høgt uppi á styrkislistanum (40), men tvey-trý vánalig kappingarár kunnu gera, at Føroyar detta langt niður og í ringasta føri missa eitt lið (sum vit sóu í 2021) ella missa rættin hjá steypavinnaranum at byrja í 2. umfari í Conference League, sum steypavinnarin hevur gjørt tey bæði síðstu árini. Til hetta seinna skal ikki so nógv til.

Forða okkum sjálvi

Tað einasta sum vit gera í løtuni í føroyskum fótbólti, tá tað kemur til flytingarvindeygað, er at leggja forðingar fyri okkum sjálvi við at hava líknandi skipanir sum lond sum Georgia, Litava og Hvítarussland. At stongja eitt flytingarvindeygað mitt í summarfrítíðini – sum er 14-17. juli - gevur nærum onga meining. Í fyrsta lagi kundi tað verið 4. august, um vit taka 2025, tá summi av liðunum spældu fyrsta landskappingardyst eftir summarsteðgin. Tað skal sjálvandi heldur ikki liggja ov nær við endan av kappingini, tá tá koma vit inná ítróttarliga rættvísi í kappingini, men stongja vit sum nógv av hinum londunum gera, tá áleið 28 % er eftir av kappingini, so merkir tað, tá átta dystir eru eftir. Tað vildi í summar verið áleið 22. august. Tað hevði givið munandi fyrimunir til bæði tey, sum selja leikarar og til liðini sum luttaka í altjóða fótbólti.

Afturat hesum kann leggjast afturat, at leikarar, sum einki felag hava, heldur ikki sleppa at skifta til føroysk felag eftir, at flytingarvindeygað er stongt. Tað kunnu teir í flest øllum londum, tó at tað sum skilst er eitt mark, har teir ikki kunnu spæla í landskappingini tey síðstu umførini.

Feløgini og FSF eiga at seta seg saman og fara at viðgera hendan spurningin og fáa broytt tíðarskeiðið fyri flytingarvindeygað í framtíðini.

Greinin er dagførd kl. 14.42