Vit hyggja fram ímóti 2025 nú árið 2024 fer at halla.

Nýtt spennandi ár stendur fyri framman í føroyskum fótbólti. Vit hava valt sjey hendingar í 2025, sum síggja áhugaverdar út..

A-landsliðið skal hava nýggjan høvuðsvenjara

Størsta venjarastarvið í Føroyum skal setast eftir eitt partvís miseydnað 2024, sum hevði ta avleiðing, at landsliðsvenjarin fekk sekkin. Her má FSF hugsa seg væl um, tí føroyskur landsliðsfótbóltur hevur brúk fyri einum skumpi. Áhugin millum føroyingar fyri landsliðnum er dalandi og lutakastið til HM-undankappingina gjørdi, at við undantaki av Fraklandi/Kroatia, so verða tað ikki mótstøðuliðini, sum koma at fylla Torsvøll í 2025. Tí er tað føroyska landsliðið, sum skal selja og sum aftur skal blíva spennandi at síggja hjá føroyingum, tí við mótstøðuliðum sum Gibraltar og Montenegro liggja møguleikar fyri at fáa nógv stig. Ein venjari, sum føroyingar verða við uppá, fer at hjálpa við at fylla Tórsvøll aftur.

Víkingur skal eftir deildarspæli

2025 verður fyrsta árið, har Víkingur fer at luttaka í altjóða fótbólti eftir leistinum síðani Conference League kom afturat í 2021 og harvið økir munandi um møguleikan hjá meistarunum at koma í deildarspæl. Víkingur verður ikki styrkismett, so tað krevur helst eitt gott lutakast fyri at vinna avgerandi 1. umfari, men eisini uttan at vinna 1. umfar ber til at koma til Conference League deildina, sum Víkingur Reykjavík m.a. prógvaði í 2024. Víkingur hevur, hóast liðið ikki hevur verið styrkismett, fingið góð lutakøst á pappírinum hesi síðstu trý árini við mótstøðuliðum frá Gibraltar, Andorra og Lettlandi. So søgan talar fyri einum góðum lutakasti.

Feløg við meira pengum og VAR

Nýggi kappingarleisturin hjá UEFA við fleiri dystum gevur eisini meira pengar, og tað drippar niðureftir. Sum vit hava skrivað um fyrr í vetur, so fara føroysku feløgini at fáa munandi størri inntøkur frá UEFA í 2025. Tað verður spennandi at síggja, hvørja ávirkan hetta fer at hava. Vandin er, at leikaralønirnar fara avstað við størsta partinum av hesum inntøkuvøkstrinum.

Harafturat verður VAR eftir ætlan partur av bestu mansdeildini í 2025. Tað verður sonevnt VAR-light við fáum kameratólum og við einum dyst hvørt umfar.

Tvey suðuroyarlið í bestu deildini

Fyri fyrstu ferð síðani 2015 verða tvey suðuroyarlið í bestu deildini. Tað fer av álvara at seta Suðuroynna á fótbóltskortið, men tað setur eisini krøv. FC Suðuroy er flutt niður øll trý árini, har felagið hevur luttikið í bestu deildini og tey bæði síðstu árini hjá TB í bestu deildini er liðið endað nr. 10 og nr. 10. Fyri fótbóltsføroyar er avgerandi, at hesi bæði liðini verða kappingarfør, tí vit hava brúk fyri, at einki lið dettur ímillum sum vit hava sæð við ÍF í 2024, TB í 2021, Skála í 2020 og ÍF í 2019.

Geza Dávid Turi á landsliðnum

Nú er greitt, at Geza Dávid Turi úr Víkingi fær sítt nýggja pass og verður tøkur til føroyska landsliðið í 2025. Hendur einki óvæntað, so er lítið at ivast í, at hann verður partur av landsliðnum beinanvegin, og tað kann hugsast, at hann fær ein leiklut beinanvegin, tí slíkir tekniskir førleikar eru ofta týdningarmikir í altjóða dystum. 23 ára gamli miðvallarleikarin kann koma at lyfta landsliðið, um hann kemur at spæla upp til sítt besta.

EM-endaspæl í Føroyum

Í døgunum 4.-17. mai verður EM-endaspæl fyri U17-gentur í Føroyum. Hetta er fyrstu ferð, at eitt endaspæl er í Føroyum í landsliðsfótbólti. Ein spennandi avbjóðing hjá FSF og fyri gentufótbólt, sum veruliga kemur á breddan hesar vikurnar.

FSF-starvsnevndarval

8. mars 2025 verður aðalfundur hjá FSF, har fýra starvsnevndarlimir standa fyri vali. Harímillum forsetin Christian F. Andreasen. Hinir sum standa fyri vali eru Róin Schrøter, Fríðin Ziskason og Rúni Herup Olsen. Greitt er longu nú, at minst ein broyting verður, tí fyri nøkrum árum síðani broytti FSF reglugerðina soleiðis, at minst eitt av hvørjum kyni skal veljast til hvørt val. Og tá bara menn standa fyri vali hesaferð, so merkir tað minst eina broyting. Tey sum ikki standa fyri vali eru Heri á Rógvi, Anja Rein og Maria Jóhannusardóttir Joensen.

Í lógunum hjá FSF stendur soleiðis um valið:

Grein 28. Val
1. Val skulu avgreiðast sum loyniligar atkvøðugreiðslur. Aðalfundurin kann tó gera av at farið verður fram á annan hátt um talið av valevnum er tað sama sum talið av tómum sessum.

2. Val skulu avgreiðast í samsvari við valreglugerðina og skal vera undir eftirliti av fundarstjóranum.

3. Øll valevni í samband við val av limum til Starvsnevndina mugu verða skotin upp av í minsta lagi einum limi.

4. Valevnisuppskot til Starvsnevndina skulu sendast til aðalskrivstovu FSF’s í minsta lagi 20 dagar fyri aðalfundin. Listin við valevnisuppskotum skal sendast til limirnar í FSF í minsta lagi 7 dagar fyri aðalfundin.

5. Tá talan er um persónsval, krevst at meira enn 50% av skrásettum og gildugum atkvøðum atkvøða fyri í fyrsta valumfari.

6. Um fleiri enn 2 valevni eru til ein sess, verður valevnið, ið fær lægsta tal av atkvøðum, tikið burtur í sambandi við næstu atkvøðugreiðsluna, til bert 2 valevni eru eftir.

7. Stendur á jøvnum, verður umval millum tey, ið standa á jøvnum, og eftirfylgjandi lutakast, um tað framvegis stendur á jøvnum.

B. STARVSNEVND

Grein 35. Samanseting av Starvsnevndini
1. Starvsnevndin er samansett av 7 limum, bæði kyn skulu vera umboðað, soleiðis:

a) 1 Forseti

b) 6 limir

2. Starvsnevndin velur ein varaforseta millum hinar starvsnevndarlimirnar; Forsetin kann skjóta sítt egna valevni upp.

3. Forsetin og limirnir í Starvsnevndini verða valdir av aðalfundinum í samsvari við grein 28 í viðtøkunum. Teir skulu standa eina integritetskanning, sum Yvirkærunevndin stendur fyri, áðrenn teir kunnu veljast, endurveljast ella útnevnast (sí fylgiskjal A).

4. Valskeiðið fyri Forsetan og limirnar í Starvsnevndini er 4 ár. Forsetin og 3 limir av Starvsnevndini skulu veljast í stakári (bæði kyn skulu vera vald). Hinir 3 limirnir í Starvsnevndini skulu veljast næstkomandi stakár (bæði kyn skulu veljast). Mandat teirra byrjar alt fyri eitt eftir aðalfundin, sum hevur valt tey og endar eftir aðalfundin, sum velur eftirfólk teirra.

5. Verða bæði kyn ikki vald til Starvsnevndina sum stk. 4 omanfyri sigur, so verður ein sessur mettur sum tómur og Starvsnevndin skal útnevna ein lim úr manglandi kyninum á fyrstkomandi fundi í Starvsnevndini eftir viðkomandi aðalfund.

6. Limirnir í Starvsnevndini skulu ikki vera eldri enn 70 ár. Limirnir skulu hava verið virknir innan fótbólt og skulu hava reina revsiváttan og hava fastan bústað í Føroyum.

7. Limur í Starvsnevndini kann ikki samstundis vera limur í óheftari nevnd og kann ikki verða útnevndur/valdur sum umboð umboðandi ein lim á aðalfundinum.

8 Um upp til tveir sessir gerast tøkir, skal Starvsnevndin røkja viðkomandi sessir fram til næsta vanliga aðalfund, tá avloysari verður valdur fyri restina av valskeiðinum.

9 Um fleiri enn tveir sessir í Starvsnevndini verða tøkir, so skulu teir eftirverandi nevndarlimirnir í Starvsnevndini kalla saman til eykaaðalfund innan fyri ásettu tíðina í grein 31, stk. 2 í viðtøkunum. Um limirnir, sum eru eftir í Starvsnevndini eina viku eftir hesa tíð ikki hava kallað inn til eykaaðalfund, so skal aðalskrivarin gera tað.

10 Einhvør nevndarsessur í Starvsnevndini er at meta sum tómur við deyða, uppsøgn ella um viðkomandi nevndarlimur varandi er forðaður at fremja sínar skyldur.

Greinin er dagførd kl. 12.46