Tað ljóðar, at avgerðin helst fellir ein av komandi døgunum.

23. januar segði forsetin í FSF, Christian F. Andreasen, at landsliðsvenjarin helst verður settur fyrra part av februar. Sum skilst hevur starvsnevndin fingið eitt tilmæli við raðfestingum frá umsitingini, sum hevur arbeitt saman við Onenexus í arbeiðnum at seta nýggjan landsliðsvenjara.

Tað var 10. januar, at bolt.fo skrivaði, at í øllum førum teir tríggir venjararnir Jakob Michelsen, Leif Gunnar Smerud og Eyðun Klakstein vóru uppá tal. Síðani er ikki so nógv nýtt hent ímun til nøvn, men eingin hevur heldur avskrivað, at tað kann verða ein, sum ikki hevur verið nevndur í miðlunum.

Sum bolt.fo skilir frá fleiri keldum, so er sannlíkt, at starvsnevndin fer at taka avgerð innan fáar dagar. Og tað ljóðar, at tað stendur millum Eyðun Klakstein og ein útlendskan venjara, sum sannlíkt er Jakob Michelsen ella Leif Gunnar Smerud. Jakob Michelsen hevur sáttmála við HamKam í bestu norsku deildini, og tí kemur hann at kosta eitt sindur at keypa leysan. Tí er kanska meir upplagt, at talan er um Leif Gunnar Smerud. Skulu vit tippa, so verður tað annar av Eyðuni Klakstein ella Leif Gunnar Smerud, sum verður komandi landsliðsvenjari.

Leif Gunnar Smerud hevur eina søgu, sum kanska minnir nógv um hana hjá Håkan Ericson, har hann hevur verið U21-landsliðsvenjari eitt drúgt tíðarskeið sum tað síðsta frammanundan. Í Fótbóltspráti hjá KVF hevur verið mett, at føroyski fólkaviljin vil hava Eyðun Klakstein, og tað at tað hevur gingið so long tíð talar eisini til fyrimuns fyri Eyðun Klakstein, ið kennir føroyskan fótbólt. Um nakrar vikur skal fyrsti landsliðshópurin úttakast til dystirnar móti Kekkia og Montenegro á útivølli.

Leif Gunnar Smerud var ein av venjarunum, sum André Olsen nevndi á bolt.fo sum ein møguleika stutt eftir, at Håkan Ericson var koyrdur.

Tá skrivaði hann soleiðis um hann:

Eitt ókent navn fyri tey flestu, men eitt sum onkursvegna hevði givið meining. Ein norskur venjari, sum hevur verið við til at skapt yvirgongdina í norskum fótbólti, har vit í dag síggja heimsstjørnur. Leif Gunnar Smerud var U21 landsliðsvenjari í Noregi frá 2014 til 2023, og hevur royndir sum tekniskur stjóri hjá Noregi. Onkursvegna kundi hesin profilurin verið við til at “inspirera” føroyska fótbóltsumhvørvið. Leif Gunnar Smærud er í løtuni uttan venjarastarv.

Leif Gunnar hevur áður hevur verið í trupulleikum sum norskur U21-landsliðsvenjari. Í 2019 noktaðu tríggir U21-landsliðsleikarar at spæla so leingi sum hann var venjari. M.a. skrivaði VG soleiðis:

– Jeg følte det var nok denne gangen (sist samling). Så lenge Smerud er coach, er jeg utilgjengelig for landslaget, sier Twente-spilleren Zekhnini til VG.

Heintz, Johnsen og Zekhnini er angivelig misfornøyd med at U21-landslagets treninger har for lav kvalitet, at spillere brukes i andre posisjoner enn de er vant til, og at landslagstrener Smerud har en altfor defensiv inngang til kampene, for å nevne noe.

Heintz hevder dessuten at Smerud henger ut og fryser ut enkeltspillere foran resten av troppen.

Leif Gunnar Smerud yvirlivdi hetta og sat fram til 2023. Í 2023 spældi Norra seg til fyrsta endaspælið tey 10 árini Leif Gunnar var landsliðsvenjari. Sambært Transfermarkt var hann venjari í 71 dystum. Vann 31, spældi 9 javnar og tapti 31. Spælistílurin var 4-4-2 og 4-3-3 tey síðstu árini. Leif hevur ikki verið venjari fyri feløg ella landslið á hægsta stigi í 12 ár við undantaki av einum dysti í 2020, tá hann var fyribils venjari hjá Norra móti Eysturríki í 1-1 javnleiki.

Eitt sum kann undra er, at tá Leif Gunnar Smerud steðgaði sum landsliðsvenjari á sumri í 2023, so var tað m.a. tí, at hann saknaði felagsfótbólt. Men síðani tá hevur hann einki felag havt. Norska fótbóltssambandið skrivaði:

Jeg har lært enormt, fått utvikle meg sammen med gode spillere og trenere i et sterkt fagmiljø, men nå er jeg klar for et nytt kapittel. Å være landslagstrener og klubbtrener er to vidt forskjellige ting, og savnet av hverdagen i klubb har jeg kjent på stadig vekk i hele min periode i NFF. Så enkelt er det.