Sonevnda solidaritets-puljan frá UEFA økist við 70-80 % og mátin at býta tað út uppá broytist eisini kollveltandi.

Solidaritets-pengar eru pengar, sum UEFA sum fyriskipari fær frá stórum kappingunum sum Champions League, Europa League og Conference League, men sum verða býtt út til feløgini, sum ikki luttaka í bólkaspæli/deildarspæli.

Vanligt hevur verið í Føroyum síðstu árini, at solidaritets-pengarnir eru oyramerktir til ymisk endamál, sum feløgini síðani hava kunna søkt um. Upphæddirnar kundu koma uppá 800.000 krónur fyri tey, sum livdu upp til øll krøvini. Les nógv meir um tað í grein, sum vit hava skrivað áður HER

Feløgini fáa stóra upphædd 1. februar

Men nú verður hetta broytt frá 2025. Tí UEFA og ECA (sum er ein altjóða felagsskapur fyri feløg) hava samtykt eina nýggja skipan. Solidaritetsupphæddirnar frá UEFA til feløgini, sum ikki koma í deildarspæl, hækka samlað 76 %. Føroyar fáa eina upphædd (70 %) eftir, hvar Føroyar liggja á listanum fyri fyri feløg og har liggja Føroyar fyri 2024/25 á 42. plássi og eina upphædd (30 %) í lutfalli eftir, hvussu stóra inntøku felagið við størstu UEFA-inntøku hjá landinum fær. Í 2026 koma Føroyar at fáa pengar útfrá 38. plássi vegna serliga úrtslitini hjá KÍ í 2023, so tá vaksa upphæddirnar. Vit hava ikki enn fingið eina útgreining um, hvussu hetta skal roknast.

Føroyar fara at fáa upphædd útfrá, at Føroyar liggja á 43. plássi av teimum 55-limalondunum hjá UEFA á fimmárastyrkislistanum fyri feløg. Kristin Dam Ziska, aðalskrivari hjá FSF, sigur, at í 2023 blivu átta milliónir býttar út í solidartetspengum. Tá lógu Føroyar á 44. plássi.

Siga vit eina øking á 76 %, so økist upphæddin uppá 14 milliónir. Men sum skilst frá keldum í føroyskum feløgum, sum hava luttikið á ECA, so kann upphæddin koma uppá 18,5 milliónir, men sum nevnt fyrr, so mangla vit upplýsingar um, hvussu hetta verður roknað út og tí skal tað takast við fyrivarni.

Sostatt fara vit burturfrá, at feløgini skulu søkja um ymiskar puljur. Ístaðin fáa tey eina stóra upphædd, har 75 % verður útgoldið 1. februar í 2025.

Upphæddirnar eru til øll lið í bestu deildini, sum ikki koma í deildarspæl og øll fáa somu upphædd, so støddin av feløgum hava ongan tydning. Fyrr hava meistararnir og liðini, sum hava luttikið í Evropa, ikki fingið eins nógv sum hini, men hetta verður nú broytt. Tó kunnu lond, um minst 75 % av feløgunum siga gott fyri tí, geva 15 % til feløgini í næstbestu deildini, sum hava síni bestu lið har. 15 % av 18,5 mió er áleið 2,8 mió, sum í 2025 skal býtast í fýra, sum gevur áleið 700.000 í part. Feløg lægri enn 1.deild fáa einki, so har fara feløgini saman við FSF væntandi helst at finna eina skipan, sum gevur teimum (í 2025 verða tey FC Hoyvík, MB og Royn) nøktandi umstøður.

Siga vit, at feløgini semjast um, at geva 15 % til 1.deild, sum helst er sannlíkt, so verða áleið 15,7 mió at býta til tey 10 feløgini í Betri Deildini, sum fer at geva 1,6 mió í part. Og 75 % av teimum verður útgoldið 1. februar, sum er áleið 1,2 mió. Afturat hesum fáa feløgini aðrar inntøkur, sum ikki eru fevndar av solidaritetspengunum. M.a. fyri navnarættindi (Betri) og sjónvarpsrættindi (Televarpið).

Krøv fylgja við

Fyri at søkja UEFA um hesar pengarnar krevst, at feløgini liva upp til nakrar treytir. Hetta eru treytir sum at felagið skal hava stýr á tí fíggjarliga, hava skipaða ungdómsdeild, hava kvinnufótbólt, venjingarumstøður og nøkur onnur ting. Við tað at hetta er nýtt fyri feløgini, so skulu tey ikki lúka øll krøvini beinanveg, men ein skiftistíð verður, har øll krøv koma í gildið um tvey-trý ár. Niðast í greinin hava vit endurgivið hesi punktini frá UEFA.

Feløgini fáa kunning

Vit spurdu Kristin Dam Ziska, aðalskrivara, um hesar broytingarnar. Hann váttar, at hetta kemur í gildið í 2025 fyri føroyskan fótbólt og at upphæddirnar økjast munandi ímun til undanfarnu ár. Men enn hevur FSF ikki fingið upplýst um upphæddir og smálutir í skipanini, men hetta væntast innan tvær vikur og tá fáa feløgini kunning um hetta.

Sostatt koma feløgini í Betri Deildini hjá monnum at hava óvanliga gott fíggjarligt grundarlag ímun til undanfarnu ár, sum longu fer at merkjast 1. februar. Men hetta fer eisini at seta krøv til feløgini, sum skulu lúka nakrar treytir, sum nevndar eru fyrr í greinini. Samstundis eru feløgini neyvan áhuga í, at øktu inntøkurnar frá UEFA enda við lønarhækkingum til m.a. leikarar, men tann vandin lúrir altíð.

Krøvini sum feløg skulu klára um tvey ár verða orðað soleiðis hjá UEFA:

Keldur:

uefa.com

ECA

fsf.fo