Mong munnu tey vera, sum hugsa: “ája, nú var hann aftur úti við rívuni, tí hann hevur okkurt persónligt móti teimum í Fótbóltssambandinum.” Tað var einaferð ein, sum segði, at nú koma árliga sparkið á skinnabeinið hjá FSF frá Kenneth.

Eg havi í fleiri ár samskiftst við flest øll í FSF, og tey eru øll fitt og fryntlig menniskju, sum eg als onki persónligt havi ímóti. Lesur ein hinvegin teir bloggar, sum eg havi skrivað, og lesur man teir væl, so man neyvan vera nakar ivi um, at eg havi áhuga fyri tí, eg skrivi – og eg havi ein brennandi áhuga í, at FSF, sum størsti ítróttarfelagsskapurin í Føroyum, gongur á odda, brýtur mørk og arbeiður proaktivt fyri, at fótbólturin flytur seg frameftir. Og alt byrjar við ungdóminum…..

John Eystberg stillar upp í móti Christiani F. Andreasen, sum hevur sitið á ovastu rók í 15 ár. Nú er endiliga stríðsval! Spennandi ella hvat?

Tað bleiv øllum kunnugt tann 17.februar, at John bjóðaði seg fram sum forsetavalevni, og tá vóru greinar í flest øllum miðlum. Eftir tann dagin hevur ein samrøðu verið við John og Christian hvør sær í Rás2. Her bleiv sligið fast av vertinum, at talan var ikki um nakað alment stríðsval, og tí vóru báðar samrøðurnar áhugaverdar men ógvuliga tannleysar. Tí soleiðis, sum landið liggur, so er trupult hjá meiniga manninum og kvinnuni at síggja, hvør munurin er á teimum.

Eitt felag hevur alment meldað út, hvar teirra atkvøður fara til, nevnliga felagið, har John dagliga venur ung og vaksin; HB. Men heldur enn at greiða frá hvørjum man atkvøður fyri, so velur man at staðfesta, at John IKKI fær atkvøðurnar frá HB. Bolt.fo skrivar greinina, har formaðurin í HB greiður frá, og eg siteri:

“John hevur gjørt eitt sera gott arbeiðið sum venjari hjá HB síðstu árini, og hann vildu vit ikki missa. Harafturat er okkara kensla, at John hevur ikki ein meiriluta millum feløg. So vit eru vónbrotin av, at FC Hoyvík soleiðis fer inn í HB eftir einum av okkara týdningarnmiklastu venjarum á gentusíðuni” Grein hjá bolt.fo

So vit kunnu staðfesta, at har John dagliga “arbeiður”, vil man ikki hava hann sum forseta, tí hann er ov umráðandi sum venjari, og tí hann ikki hevur meiriluta millum feløg. Samstundis hartar man annað felag fyri at “fara eftir” honum. Onki við hví man velur Christian. Tað gangi eg bara sterkt útfrá, at man ger.

Hetta er tað einasta, sum er at lesa um forsetavalið. Har er onki annað. John hevur, sum hann sjálvur vísur til á sín facebook vanga, skrivað til øll feløg í eini roynd at sannføra tey. So hevur hann sjálvur nøkur kjarnuvirði, sum hann deilur við okkum øll.

Eg havi sjálvur vant ung í nógv ár, og eg og John hava staðið yvirav hvørjum øðrum við hvør sínum gentuliði. Eg havi somuleiðis siti á skúlabonki við John, tá vit báðir tóku venjaraskeið saman. Tað bæði hoyrist og sæst, at John brennur fyri fótbóltinum, hann brennur fyri menning; fyri tey ungu. Hann er skilagóður, fólksligur, og eg vænti ikki, at eg sigi ov nógv, tá eg sigi, at tað man neyvan vera nakar, sum hevur nakað ilt at bera John.

Í fleiri ár havi eg eftirlýst eitt “opið” stríðsval. Opið skilt á tann hátt, at feløgini fáa okkurt at fyrihalda seg til. Eru valevnini bæði ósamd á nøkrum økjum? Hví tekur sendingin “Fótbóltsprát”, sum í fleiri vikur bara hevur tosað um venjingardystir, slatur og komandi landsliðsvenjarar ikki tikið valið upp á tungu. Hví hevur man ikki bjóðað teimum til eitt kjak? Hví fyriheldur man seg ikki til, at sami forseti hevur sitið í 15 ár og gongur í móti teim 19. Hevur man ikki tørv á broyting? Hevur man ikki hug at hoyra, hví Christian heldur, at hann er eitt betur val enn John? Ella er tað undirforstaðið? Aðrir miðlar fáa sama kritikk.

Onkur vil eisini vera við, at feløgini skulu nokk finna útav hasum sjálvi, uttan at alt Føroya fólk fær tað við. Møguliga tað, men hví verður so ikki kallað inn til ein kjakfund, har “bara” feløgini verða bjóðaði? Tá atkvøðast skal, eru sjálvdan meira enn tvey umboð pr felag, onkuntíð bara eitt. So er tað hetta eina umboðið, sum skal avgera, hvar krossurin skal setast. Hava øll feløgini ítøkiliga viðgjørt forsetavalið, ella hongur man bara í halan á teimum stóru feløgunum? Eru nývaldu forfólkini ella nevndarlimirnir í teimum ymisku feløgunum íklædd til at hava eina so týðandi meining so stutt undan eini so stórari avgerð?

Nú eru bara tveir dagar til sjálvt valið, og tað spyrst neyvan nakað meir burturúr hesum stríðsvalinum. Tað hevði eg ynskt. Eg vóni bara, at óansæð hvørjum forfólkini atkvøða fyri, so er tað mín vón, at man hevur fingið greitt at vita frá báðum valevnum, hvat viðkomandi ætlar at avrika komandi fýra árini. Spyrjið tykkum sjálvi, um tit veruliga hava hugsað, hví tit fara at atkvøða, sum tit gera. Tit hava rættiliga stórt vald, og tit eru eisini vald í nevnd at umsita hetta við ábyrgd og harvið at seta tykkum inn í forsetavalið.

Góða eydnu til bæði Christian og John,

gott val!