Tað verður eyka stórur áhugi fyri kvøldsins dysti í Sarpugerði. Tí bæði liðini hava nýggjar landsliðsleikarar við. Víkingur hevur fingið havnamannin Hanus Sørensen, sum skiftir frá slovenskum fótbólti. Hann verður leigaður og nýggir reglar hjá FSF siga, at um ein hevur 80 % lokalan hóp, so kann ein leiga ein leikara eftir, at flytingarvindeygað er stongt. Tí verður hann við longu í kvøld. Hetta hevur FSF valt fyri at eggja feløgunum at satsa meira lokalt og harvið fáa onkrar ágóðar, tá flytingarvindeygað annars er stongt.

HB hevur eisini styrkt um hópin. Tað er enn meira óvæntað, tí klaksvíkingurin Jóannes Bjartalíð fer nú at spæla við HB. Hann hevur spælt í Kasakhstan í ár, men hevur síðstu tíðina arbeitt við at skifta aftur til føroyskan fótbólt. HB hevur víst stóran áhuga, tí HB er enn nakað skert í álopspartinum og eftir góðu byrjanina er hetta ein møguleiki, sum HB ikki kundi siga nei til. Í Klaksvík kemur tað illa við, at Jóannes endar í HB og í Víkingi føla tey við KÍ-viðhaldsfólkunum. Tí bjóðar Víkingur øllum KÍ-viðhaldsfólkum ókeypis inn til fyrsta dystin hjá Jóannes í HB í Sarpugerði, um tey eru í KÍ-blusu, tá tey koma til innkrevjararnar. Jóannes er sloppin av við skaðan í rygginum og fær eisini loyvið at spæla eftir nýggju reglunum hjá FSF sum siga, at um eitt felag brúkar møguleikan at styrkja seg eftir kvotuni um lokalar leikarar, sum Víkingur hevur gjørt, so kann mótstøðuliðið altíð eisini fáa ein leikara inn fram til flytingarvindeygað letur uppaftur í summar. Hetta er fyri at líkastillað liðini.

Dysturin, har Hanus Sørensen og Jóannes Bjartalíð spæla sínar fyrstu dystir fyri Víking og HB byrjar kl. 19.00.