Vit hava hugt eftir, hvussu stuðulsskipanirnar hjá FSF eru settar saman í 2023 í mun til, hvat feløgini fáa og hvør munurin er á, hvat eitt meistarafelag, eitt evropafelag, eitt felag uttanfyri evropa, eitt 1.deildarfelag og eitt 2.deildarfelag fáa.
Í summum førum leggur UEFA upp til, at stuðul skal bara fara til feløg, sum ikki spæla í Champions League. Og í summum førum eru tað FSF, sum útfrá semju millum feløgini, hevur gjørt átøk, har munur verður gjørdur á, um feløgini luttaka í altjóða fótbólti ella ikki. Meistarin hevur tryggjað sær eina inntøku á áleið 6,0 milliónir, meðan liðini sum luttaka í Conference League hava tryggjað sær eina inntøku á 1,9 millión. Síðani fáa liðini um 2,2 milliónir afturat, um tey koma víðari. Av hesum skulu so ferðaútreiðslur, bonus o.a. útreiðslur.
Stuðulsskipanir frá FSF til feløgini, har munur verður gjørdur á alt eftir, um feløgini luttaka í Evropa ella ikki.
Útgreining:
Fyri MAFF tølini eru hesi tølini treytað av, at Evropalið og restin av feløgunum í Betri Deildini fíggja 70.000 sjálvi, at 1.deildarfeløgini fíggja 115.000 kr. og at 2.deildarfeløgini fíggja 50.000 kr.
Fyri tølini hjá høvuðsungdómsvenjaranum eru hesi tølini treytað av, at feløgini fíggja 50.000 kr. sjálvi
Stuðul til venjarar er stuðul til útbúnar (B/C-útbúgving) U11/U13 venjarar hjá gentum/dreingjum. Skipanin kemur so líðandi í gildi, men er komin uppá hesar upphæddir í 2025.
Í stuðli fyri ungdómsleikarar er talan um ein stuðul á 555 kr. fyri hvønn ungdómsleikara upp til U17/U18 hjá gentum og dreingjum. 114.000 kr. er eitt miðaltal. Fyri størstu feløgini liggur hetta á áleið 233.000 kr. í miðal og fyri smæstu feløgini liggur hetta á áleið 32.000 kr. í miðal. Veist tú talið av gjaldandi skrásettum ungdómsleikarum upp til og við U17/U18 í tínum felag, so ber til at rokna tað út, har hvør leikari fær 555 kr. í stuðli frá FSF.
Afturat hesum koma avtalir fyri t.d. sjónvarpsrættindi og stuðulsavtalir fyri kvinnufótbólt, men har fáa øll luttakandi feløgini eins nógv (her tosa vit sum skilst um 222.000 kr. fyri tey, sum lúka allar treytir). Hetta yvirlitið er sett upp fyri at vísa, hvørji átøk blíva gjørd fyri at ’’javna’’ pengarnar, sum FSF fær at ráða yvir frá UEFA og FIFA.