Vit greina, hvat gekk galið hjá Håkan Ericson og hví hann bleiv uppsagdur.

Í gjár kunngjørdi FSF, at landsliðsvenjarin Håkan Ericson bleiv uppsagdur. Eitt gott ár áðrenn sáttmálin gekk út. Her hyggja vit afturá tíðina og vísa á summi øki, har tað gekk galið hjá landsliðsvenjaranum.

Eingin kappingarsigur í tvey ár

Høvuðsorsøkin til eina uppsøgn er ofta manglandi úrslit, og tað er eisini høvuðsorsøkin hesaferð. Føroyar hava ikki vunnið ein kappingardyst síðani í september í 2022. Frá 2020 og fram til 2022 var gongdin annars á fleiri økjum jalig. Ein uppflyting í Nations League, ein góðkend HM-undankapping, har liðið ofta stóð seg leikliga væl móti sterkum tjóðum og so ein góðkend kapping í deild c í Nations League við átta stigum. Men tað gevur eina misvísandi mynd, tá FSF og landsliðsvenjarin sjálvir vísa á, at hesi árini hava verið tey søguliga bestu landsliðsárini í úrslitum, tá helvtin av kappingardystunum hevur verið í Nations League, har mótstøðan er lutfalsliga nógv veikari. Ein kapping, sum allir aðrir landsliðsvenjarar ikki høvdu við undantaki av einari kapping hjá Lars Olsen í 2018. Í HM- og EM-undankappingum vóru tríggir landsliðsvenjarar betri í stigum pr. dyst.

Mongu avboðini

Tað bleiv við tíðini ov lætt at geva avboð til serliga venjingardystir, har feløg (har leikarar ofta fáa ein triðing sjálvir) ikki fáa landsliðspengar. Í fleiri førum vóru leikarar frískir at spæla, men valdu landsliðið frá og í fleiri førum var sterkur mistanki um, at tað skuldi lítið til hjá leikarum at geva avboð. Hetta er eitt ósunt tekin.

Løgnu valini

Gjøgnum øll árini hevur Håkan Ericson tikið nøkur løkin leikaraval, sum stórur partur av fólkinum ikki hevur skilt. Eitt tað fyrsta var at taka Andreas L. Olsen út. Tað sum var serligt við hesum var, at leirvíkingurin til dagligt sat á bonkinum fyri Víking, sum tá var eitt miðallið (nr. 5). Andreas skoraði eitt týdningarmikið mál móti Malta, men yvirskipað er tað eitt óvanligt stig at taka ein leikara á bonkinum í Betri Deildini út til A-landsliðið. Seinni var tað Páll A. Klettskarð, sum serliga kappingarárið 2023 fram til norðoyastevnu 2023 var klárt besti leikarin og toppskjúttin í føroysku kappingini, men sum bleiv vrakaður á landsliðnum og sum seinni segði takk fyri síðst, tá brúk var fyri honum. Við at vraka Páll gjørdi Håkan tað ikki lætt fyri seg sjálvan. Síðstu dystirnar var tað Hannes Agnarsson, sum fekk pláss í uppstillingini á somu plássum, sum Adrian Justinussen og Petur Knudsen, ið eru leikarar við nógv nógv fleiri málstigum í sær yvir longri tíðarskeið.

Vit hava eisini manglað at sæð íblástur frá yngri leikarum. Fyri stuttari tíð síðani høvdu Føroyar tað elsta landsliðið í Evropa og hyggja vit søguliga sæð, so hevur Håkan Ericson havt allar føroysku uppstillingarnar við hægst miðalaldri. Tað kemur næstan ikki fyri, at U21-leikarar eru á A-landsliðnum, og tað hevur eina avleiðing, at leikarar eru lutfalsliga gamlir, áðrenn teir binda seg fastar á A-landsliðum.

Eingin uppbakningur til endans

Nú til endans var nærum eingin uppbakningur eftir. At tað kom alment fram, at starvsnevndin hjá FSF eftir tapið í Lettlandi hevði havt starvsnevndarfund, har høvuðsevnið var framtíðin hjá Håkan, hjálpti ikki, tí tá er vanliga bara spurningur um tíð.

Áskoðararnir blivu færri. Skansin hevur ongantíð verið so illa mannaður sum síðstu dystirnar. Landsliðsvenjarin fór síðstu tíðina, og tað gjørdi hann eisini í tíðindaskrivinum í gjár, at vísa á viðurskifti, sum nógvir føroyingar als ikki vilja hoyra. Tað er um, at vit eru so fá, at vit ikki hava nógv leikaraval ella líka nógvar pengar sum onnur. Við tí hugburðinum koma vit ongan veg. Hygg eftir úrslitum hjá londum sum Kroatia, Danmark, Uruguay og Íslandi. Ella hvat KÍ gjørdi í 2023 móti meistarum úr Ungarn og Svøríki og seinni móti franska Lille. Og har hava vit eisini fleiri úrslit hjá A- og U-landsliðum hjá Føroyum gjøgnum tíðina, sum ikki hava samsvara við fólkatal, leikaraúrval og pengar. Føroyingar vilja ikki hoyra slíkt, og tað hevur Håkan Ericson neyvan vita, tí annars hevði hann ikki sagt tað alment.

Fyrrverandi hjálparvenjarin og liðskiparin á landsliðnum, Jóannes Jakobsen, hevur ofta havt eina útsøgn, sum føroyingum dáma betri. Tað er, at tá vit tosa um føroyska landsliðið, so mugu vit ómøguliga verða realistisk. Tí eru vit realistisk, so eiga vit at liggja millum áleið trý tey vánaligastu liðini av teimum 55 UEFA-limalondunum.

Millum feløgini hevði landsliðsvenjarin, sum hevur eitt starv við bestu ella útvið bestu lønini í føroyskum fótbólti (sigst liggja millum eina og tvær millión um árið) síðstu tíðina ongan uppbakning. Tey vístu eftir fund í Fuglafirði í 2023 á, at tey høvdu stóran kritikk til, at FSF longdi sáttmálan við tveimum árum. FSF má eisini hyggja inneftir, tá slíkar fótbóltsfakligar avgerðir skulu takast, tí semja tykist verða um millum mong, at báðir teir síðstu landsliðsvenjararnir, Lars Olsen og Håkan Ericson, fingu eitt sáttmálaskeið ov nógv bjóðað frá FSF.

Í miðlunum bleiv kritikkurin eisini størri og størri frá viðmerkjarum og hetta tóktist ávirka venjaratoymið skeiva vegin síðstu árini. Og slíkar útsøgnir, tá tær koma yvir tíð og ikki bara eftir einstøk úrslit, hava ofta størri tyngd aftanfyri seg enn fleiri geva sær far um, tí ofta vita viðmerkjarar t.d., hvat rørist í leikarahópi, hóast tað vanliga ikki verður nevnt. Byrjar ein venjari fyrst at fáa miðlarnar ímóti sær, so kann tað ofta tykjast enn tyngri at venda gongdini. Tað hava vit ofta sæð uttanlands.

Úrslitini dalaðu, áskoðaratalið minkaði, avboðini øktust og ónøgd frá feløgum, miðlum og leikarum vaks. Tí hevði FSF einki annað val enn at gera tað fyri FSF søguliga óvanliga takið av uppsiga landsliðsvenjaran, eitt ár áðrenn sáttmálin gekk út.