Nýggj stuðulskipan hjá FSF leggur upp til, at feløgini skulu seta eitt fyrisitingarfólk á fulla- ella hálva tíð.

Á aðalfundinum hjá FSF leygardagin kom m.a. fram, at sonevndi MAFF stuðulin verður broyttur, har feløgini fáa enn betri møguleikar. Frammanundan var skipanin soleiðis:

FM-vinnari: 0 kr.

Evropalið: 0 kr.

Betri Deildin: 218.000 kr.

1.deild: 128.000 kr.

Rest: 60.000 kr.

Hetta verður broytt nú í 2023. Liðini fáa nú grundupphædd:

FM-vinnari: 0 kr.

Evropalið: 0 kr.

Betri Deildin: 220.000 kr.

1.deild: 130.000 kr.

Rest: 80.000 kr.

Afturat hesum fáa øll í Betri Deildini uttan FM-vinnarin møguleikan at søkja um ein stuðul á upp til 70.000 kr. í eini krónu fyri krónu skipan sum merkir, at feløgini tá skulu fíggja 70.000 kr. sjálvi fyri at fáa stuðul á 70.000 kr. Feløgini sum hava sítt besta lið í 1.deild fáa møguleikan at søkja upp til 115.000 kr. eftir sama leisti og liðini sum hava sítt besta lið í 2.deild kunnu søkja upp til 50.000 kr. eftir sama leisti.

Tað merkir, at fyri feløgini í Betri Deildini uttanfyri Evropafótbólt, so kunnu tey fáa ein stuðul á 290.000 kr., um tey fíggja 70.000 kr. sjálvi, so at fígging tá er til eitt starvsfólk á 360.000 kr. Velur felag at seta starvsfólk, ið skal hava hægri løn, so skal felagið gjalda tann munin. Fyri feløgini í 1.deild verður upphæddin í mesta lagi 255.000 kr. frá FSF, har felagið fíggjar 115.000, so at fígging tá er til eitt starvsfólk á 370.000 kr. Fyri feløgini í 2.deild er hægsta stuðulsupphædd 130.000 kr, har felagið fíggjar 50.000 kr. so at fígging er til starvsfólk á 180.000 kr.

Eitt fyrisitingarfólk tekur sær av dagligu uppgávunum uttanfyri vøllin í felagnum.

Í stuttum merkir hetta, at fígging nú er til eitt fyrisitingarfólk:

Feløg í Betri Deildini uttanfyri Evopa: 360.000 kr. (FSF 290.000 og felag 70.000)

Feløg í 1.deild: 370.000 kr. (FSF 255.000 og felag 115.000)

Feløg í 2.deild: 180.000 kr. (FSF 130.000 og felag 50.000)

Velja feløg at seta fólk við hægri løn, so gjalda tey munin sjálvi. FM-vinnarin fær ikki part av hesum, meðan hini Evropaliðini fáa upp móti 70.000 í stuðli, um tey fíggja 70.000 sjálvi. Útskiftingin í nevndunum hevur verið stór síðstu árini í nógvum feløgum og hetta er helst ein roynd, at m.a. fáa arbeiði uttanfyri vøllin at ganga betri og at lætta um gerandisdagin hjá nevndunum.

Bolt.fo kemur seinni í vkuni við einum yvirliti yvir, hvussu stuðulsskipanirnar eru skipaðar ímun til, hvørs liðini eru í Champions League, Conference League ella uttan Evropafótbólt.