Tórsvøllur er nærum liðugt útbygdur, og tað gevur pláss fyri stórum íløgum komandi árini.

Á aðalfundinum hjá FSF leygardagin var ein ársfrágreiðing og ein formansfrágreiðing frá forsetanum løgd fram fyri feløgini.

Christian F. Andreasen, forseti, sigur m.a. í frágreiðingini:

Sum nevnd í formansfrágreiðingini seinasta ár, so fór starvsnevndin at viðgera, um tíðin var búgvin at fara undir hallarverkætlan, soleiðis at vit fáa eina fótbóltshøll, sum kann hýsa dystum.

FSF kann ikki byggja ella reka ena høll einsamælt, og tískil kann ein høll bert byggjast saman við øðrum viðspælarum, eitt nú saman við kommunum og øðrum, sum vilja stuðla eina slíka verkætlan. Starvsnevndin hevur samtykt at fara í eina tilgongd, har finnast skal fram til, um áhugi er at byggja eina høll saman við FSF, har FSF leggur 30 mió kr. í verkætlanina

Formenninir eru kunnaðir um tað, og áðrenn nøkur endalig støða verður tikin, so verður hetta sjálvandi aftur viðgjørt saman við feløgunum.

Í ársfrágreiðingini stendur, at eftir at semja bleiv um fyri nøkrum árum síðani, at A-landsdystirnir skuldu spælast á Tórsvølli, so er størsti parturin av UEFA HaTrick stuðlinum og FIFA Forward stuðlinum, ið er ætlað til íløgur, farin til Tórsvøll. Nú er Tórsvøllur um at verða liðugur, so møguleiki verður fyri stórum verkætlanum komandi árini.

Ein kostnaður á 80 milliónir hevur verið nevndur fyri onkra av fótbóltshallunum, sum hava ligið á borðinum.