AB vann 2-0 í sínum nýggja leikluti sum favorittur í einum dysti.

AB hevur verið mest óvæntaða liðið fyri mong fyrstu fýra umførini í ár, har uppflytararnir hava níggju stig av 12 møguligum. Tað er bara í javna dystinum í Runavík, at AB ikki hevur fingið fulla úrtøku.

Í heimadystinum móti 07 Vestur í gjár var AB greiður favorittur hjá mongum og tann nýggja leiklutin megnaði AB eisini, hóast leikliga avrikið kanska ikki var so sannførandi sum onkran annan dyst. Undan dystinum bleiv Sjúrður Henriksen valdur til besta leikaran í mars mánað, hóast hann bara spældi tveir av trimum dystum, og hann var annar av málskjúttunum í 2-0 sigrinum á 07 Vestur.

AB hevur styrkt seg nógv betri enn Skála

Fyri mong er tað kanska óvæntað, at so stórur munur er á báðum uppflytarunum, tí Skála endaði frammanfyri AB í fjør tó at munurin bara var trý stig umframt ein nógv betri málmun.

Men AB hevur styrkt hópin nógv betri enn Skála og tað er kanska ein av orsøkunum.

Longu á sumri í 2024 fekk AB danskan málverja í Jesper Sørensen. Hann vísti seg at verða ein dugnaligur málverji og fyri onkran viðmerkjara kom tað óvæntað á, at AB megnaði at varðveita hann í vetur. Har gjørdi AB helst skjótt av, tí 14 oktober boðaði felagið frá, at hann hevði gjørt nýggjan tveyára sáttmála. Somuleiðis bleiv eittára sáttmáli gjørdur við danska Luca Thorstensen, sum hevur verið sannførandi vongbakkur síðani hann kom á sumri í 2024.

Undan endaspurtinum í fjør fekk AB tilgongd av Obule Moses úr Nigeria, sum í 2022 var ein av leikarunum, sum FC Midtjylland valdi at fáa í sína ungdómsdeild frá samstarvsfelagi í Nigeria. Og longu frá tí at hann byrjaði at spæla í 18. umfari í fjør, var AB betri enn Skála í úrslitum í 1.deild.

Og so spæla teir bestu lokalu nú aftur við AB. Bjarki Nielsen kom frá B36 fyri einum ári síðani og í vetur kom Ragnar Skála frá Víkingi.

Í vetur kom eisini sterki verjuleikarin Jimmy Abdul frá FC Suðuroy, sum í fjør hevði fingið sínar fyrstu royndir úr bestu deildini, og tí kendi kappingina. Tí er verjuparturin hjá AB blivin enn sterkari og hann lat bara 16 mál inn í fjør í 1.deild og hevur bara latið mál inn í einum av fýra dystum í ár, sum var í Runavík móti NSÍ.

Tann fimti útlendingurin kom til stutt áðrenn flytingarvindeyga stongdi og hann hevur ikki spælt tað stóra enn, men hinir fýra hava allir lyklaleiklutir. Afturat hesum eru eisini leikarar sum Brian Jakobsen (á sumri í fjør) og Páll Eirik Djurhuus, sum vóru dotnir niður ímillum í øðrum feløgum, komnir og hava passað væl inn og gjørt mun.

Skála hevur ikki styrkt seg á sama hátt, kanska av fíggjarligum orsøkum, og tað sæst, nú níggju stig eru millum uppflytararnar eftir fýra umfør.