B68 fer um nakrar vikur at seta nýggjan høvuðsungdómsvenjara í fulltíðarstarv.

B68 skrivar:

B68 Tofta Ítróttafelag sóknast eftir høvuðsungdómsvenjara

Vit í B68 leita eftir einum fakliga førum og ágrýtnum høvuðsungdómsvenjara, sum kann byrja skjótast gjørligt.

B68 Tofta Ítróttafelag er eitt felag við djúpum rótum og sterkum felagsskapi – við leikarum úr Nes kommunu. Vit hava í fleiri ár ment eitt sterkt ungdómsarbeiði og vilja nú taka enn eitt stig fram á leið.

Felagið hevur ein greiðan málsetning um at menna leikarar frá grundini, og vit leggja stóran dent á trivnað, felagsanda og fótbóltsliga menning.

Vit bjóða:

 Eitt spennandi fulltíðarstarv við avbjóðingum og møguleikum at seta tín dám á framtíðina hjá felagnum.

 Góðar umstøður við eldhugaðum venjarum, ungdómsnevnd og stuðlandi umhvørvi.

 Møguleika fyri fakligari og persónligari menning í einum felag við visjónum og virðum.

Arbeiðsøki: Sum høvuðsungdómsvenjari kemur tú at hava ein lyklaleiklut í at skipa, menna og samskipa alt ungdómsarbeiðið í felagnum.

Tú kemur at arbeiða tætt saman við ungdómsnevndini, hjálparvenjarum og foreldrum. Arbeiðsuppgávurnar fevna m.a. um:

 Vegleiðing og stuðul til ungdómsvenjarar.

 Tryggja at venjingarnar fylgja læruætlanini og eru á hóskandi støði.

 Eygleiða dystir og geva afturboðan til leikarar og venjarar.

 Hava venjingar og vera nógv á vøllinum tá venjingar og dystir/kappingar eru.

 Vera við til at skipa fyri fótbóltsskúla og luttøkudegi hjá B68.

 Skipan av venjarafundum og luttøka á foreldrafundum.

 Hjálpa við ársætlanum og lærutilfari.

 Samskifti við foreldur og virkin felagsskapur kring liðið.

 Eggja og stimbra framhaldandi menning hjá venjarum.

Vit vænta, at tú:

 Hevur galdandi B-venjaraprógv.

 Hevur koyrikort og ert ferðafør/ur.

 Hevur minst 4 ára royndir sum venjari við børnum og ungum.

 Dugir væl at arbeiða sjálvstøðugt og skipa títt egna arbeiði.

 Ert fyrikomandi, samstarvssinnað/ur og arbeiðssamur við jaligum lyndi.

Setanar- og lønarviðurskifti: Talan er um eitt fulltíðarstarv við fastari løn. Arbeiðsstaðurin er á Svangaskarði.

Meira at vita: Meira fæst at vita um starvið við at venda sær til formannin í felagnum, Jóhannus Danielsen, á telefon 234216 ella telduposti: b68@b68.fo

Umsókn: Umsókn við lívsrensli og viðkomandi prógvum skal sendast til: b68@b68.fo

Freistin at søkja er: 15. august kl.20:00