Dagsins mest sannførandi avrik var kanska tað frá B36, sum vísti, hví tað ikki er av tilvild, at B36 hevur skorað flest mál í deildini higartil í ár.

Tað endaði sum so ofta 2-2 millum HB-B36. Talan var eisini um ein undirhaldandi dyst, men tað eru teir í norðara enda, sum skulu fegnast nógv meir um javnleikin. Tí B36 var betra liðið stóran part av dystinum og hevði teir flestu málmøguleikarnar. Nakað av vindi var, sum kanska ávirkaði nakað. Í fyrra hálvleiki hevði HB mótvind og hevði sera torført við at spæla seg frameftir vøllinum. Tað mann verða sjáldan, at HB hevur mist bóltin so ofta í uppspælinum á egnari hálvu ein hálvleik. B36 kom til nógvar støður og nakrar málmøguleikar, men tað var HB sum skoraði fyrsta málið í sínum fyrsta álopi, tá B36 vildi hava fríspark í eini støðu, sum Heini Vatnsdal undir vanligum umstøðum plagar at avgreiða. B36 fekk tó javnað við flottum máli og og hevði so nógvar støður, at teir hvítu skuldu havt verið á odda í hálvleikinum.

HB betri við

Í seinna hálvleiki bleiv tað javnari og HB kom á odda eftir vælspælt álop, sum endaði við, at Stefan Radosavljevic takkaði fyri álitið at endiliga sleppa at byrja ein fótbóltsdyst eftir góða sending frá Ejvind Mouritsen. Bæði liðini høvdu møguleikar, men B36 fekk javnað og síðsta partin av dystinum fekk B36 tveir stórar málmøguleikar, sum skuldu havt givið mál. Tað endaði 2-2. Hjá HB hoyrir tað til søguna, at liðið er nógv skert í álopspartinum. Moses Ebiye hevur ikki fingið loyvini uppá pláss, Erik Sorga er nýggjur í føroyskum fótbólti, meðan Jákup Thomsen er skaddur. Storm Bugge Pettersen hevur verið sannførandi, men mátti skaddur av vøllinum í fyrra hálvleiki.

B36 hevur lagt nógv uppá

Dagsins B36-avrik var uppá nógvar mátar sannførandi, tó at tað ikki er feilfrítt, tá so gott avrik bara kastar eitt stig av sær. Í ársins MeistaraDeild hava vit enn sjáldan sæð gott fótbóltsspæl frá topp 5 liðunum frá í fjør, har tað varna við lágum váða hevur vunnið alt ov nógv fram. Tí var fríkst at síggja B36. Trýst langt frammi á vøllinum og tá bólturin blev vunnin, sum hann bleiv ofta, so var tað ofta bara ein vegur, og tað var frameftir. Ágangandi, beinleiðis og skapandi spæl. Nógv orka er á liðnum og B36 er at síggja til kanska tað topp 5 liðið frá í fjør, sum er mest styrkt av fleiri orsøkum. Dávid B. Andreasen var leikarin, sum í báðum málunum hjá B36 vann bóltin av mótstøðuliðnum, Boubacar Dabo var ein støðug hóttan og átti eina uppleggið, tó at hann var heppin ikki at fáa tvey gul kort, meðan Torgeir Børven aðrar dystir hevur fingið fleiri málstig. Í verjuni er Heini Vatnsdal stóra ’’keypið’’, sum eisini hevur viðført, at Bogi Reinert-Petersen er farin fram á miðvøllin, har hann spældi sera væl. Teir ungu lokalu leikararnir tykjast hava tikið seg nógv fram. Har kann Jógvan K. Gullfoss a miðvøllinum nevnast, sum spældi væl.

Tað sum kann blíva ein forðing hjá B36 er, um skaðar og leikbann koma, tí tað tykist á summum plássum verða stórur munur í dygd á leikarunum sum spæla og so teimum, sum eru eykaleikarar, men dagsins B36-lið var undirhaldandi at síggja og tóktist verða fult á hædd við hini toppliðini í deildini í dygd útfrá tí, ið vit hava sæð fyrstu fýra umførini.