Við skiftinum til Seriu A felagið Hellas Verona so verður Andrias Edmundsson føroyingurin, sum fer at spæla á nógv hægsta stigi uttanlands.

Andrias Edmundsson væntast at skifta til Hellas Verona í Seriu A fyri eina upphædd, sum kann koma uppá 26 milliónir krónur. So stórt skiftið hava vit ikki sæð nakran føroying gjørt áður og hann er eisini nógv dýrasti føroyingur nakrantíð.

Stóra stjørnan

25 ára gamli toftamaðurin verður nú í serflokki størsta føroyska fótbóltsstjørnan. Tað hevur hann eisini verið áveg ímóti í eina tíð, tí hann hevur spælt sera sannførandi fyri oddaliðið í Póllandi og avrikini á landsliðnum hava mangan skarað framúr síðstu árini. Gunnar Nielsen hevur spælt ein dyst í Premier League og Jóan Símun Edmundsson hevur spælt fimm dystir í Bundesliguni. Nú kemur tann triði á slíka hill, men munurin hesaferð er, at Andrias er keyptur fyri yvir 20 milliónir og tað burdi økt um møguleikarnar fyri, at hann er ætlaður ein stóran leiklut á liðnum. Tí kann hetta blíva tann føroyingurin, sum fer at røkka longst um stutta tíð, tí vit hava aldrin havt ein føroying, sum hevur spælt regluliga í einari av heimsins bestu deildum. Til heimadystirnar koma yvir 20.000 áskoðarar í miðal at verða og til onkrar av útidystunum móti stóru feløgunum væntast yvir 40.000 áskoðarar. Mótstøðuliðini verða m.a. tey kendu AC Milan, Juventus, Inter, Napoli, Lazio, Atlalanta, Roma, Parma og Fiorentina. 15 dystir eru eftir og Hellas Verona liggur til niðurflyting, men bara fýra stig eru upp til niðurflytingarstrikuna. Skuldi tað hent, at liðið flytir niður, so er Seriu B eisini ein deild á høgum stigi, sum hevur væl meira virði enn t.d. bestu deildirnar í Danmark, Norra og Póllandi. Og hyggja vit eftir, hvar Hellas Verona hevur selt leikarar til síðstu árini, so er talan ofta um stór feløg á hægri stigi enn Hellas Verona.

Kann drippa á aðrar føroyingar

Fyri ungar føroyingar, sum ætla sær uttanlands ella eru uttanlands og ætla longri, so kann tað hava týdning, um ein sum Andrias fer at klára seg væl. Tí fer ein føroyingur at standa seg væl á høgum stigi, so verða eyguni í størri mun enn frammanundan vend móti føroyskum leikarum. Vit síggja t.d. í Íslandi, at har selir mann seg væl sum fótbóltsleikara við at verða frá Íslandi vegna gott umdømi fyri m.a. hugburð, og tí hevur tað í fleiri ár verið stórur áhugi fyri íslendskum leikarum uttanlands. Í Føroyum hava vit havt ov fá dømi við undangongumonnum uttanlands. Men tað er sum um, at okkurt kanska er við at broytast, tí fyrr í vetur bleiv U21-landsliðsleikarin Áki Samuelsen seldur til svensku meistararnar fyri yvir sjey milliónir eftir at hava skarað framúr í næstbestu norsku deildini. Tað var tá størsta sølan av føroyskum leikara nakrantíð. Og so eru úrslitini hjá føroyska A-landsliðnum, U21-landsliðnum og føroysku liðunum í altjóða kappingum góð.

Nú er at vóna, at alt gongst sum ætlað so at undirskriftin kemur uppá pláss, og at tað fer at gangast fyrsta føroyinginum í Seriu A væl. Í B68 eru tey helst eisini stolt, tí har er Andrias uppaldur og FIFA-reglur siga, at B68 fær eina upphædd. Onkur útrokning sigur áleið 200-300.000 krónur, men tað skal takast við fyrivarni. Tað verður roknað eftir árum, har hann spældi frá tí hann var 12 ár og upp til 23 ár. Hann var 16 ár, tá hann síðstu ferð spældi fyri besta liðið hjá B68 og eitt ár spældi hann í NSÍ.