Helst má FSF slaka í sínum kravi um, at hjálparvenjarin ikki skal spæla í Betri Deildini, um tað skal verða Atli Gregersen, sum verður hjálparvenjari.

Í dag hevði portal.fo eina grein um, at Atli Gregersen neyvan verður hjálparvenjari hjá Eyðun Klakstein.

Og sambært okkara upplýsingum, so er óvist, um Atli verður hjálparvenjari. FSF ynskir, at Atli gevst at spæla, men tað ynskir Atli ikki uttan so, at talan er um ein sáttmála, sum ger tað vert at siga farval við Víking, Champions League og virkna lívið sum leikari.

Tí er helst neyðugt hjá FSF at slaka í kravinum og loyva Atla at spæla, um hann skal verða hjálparvenjari hjá Eyðuni Klakstein.

Spurningurin er so, hvønn veg hetta fer, og um tað ávirkar støðuna hjá Eyðuni, tí Eyðun og Atli hava arbeitt saman tey síðstu árini og fyri mong er hetta ein ’’pakki’’ við ymiskum førleikum, sum hevur givið góð úrslit á U21- og A-landsliðnum. Tí kann kanska hugsast, at Eyðun fer at krevja at skula hava Atla sum hjálparvenjara og so má slakast í krøvunum frá FSF á hesum økinum.