Tað ljóðar, at tað verða stórar broytingar í B36 eftir eitt sera miseydnað kappingarár, har liðið endaði uttanfyri topp 4, tapti steypafinaluna og kom ikki víðari í Conference League.

Í fótbólti eru marginalarnir ofta lítlir. B36 spældi leygarkvøldið eina steypafinalu, har liðið fram til 84. minutt var á veg móti sigrinum og seinni eisini á odda í brotssparkskappingini. Men endaði við at tapa og fylgjurnar eru stórar. Tí B36 hevði tryggjað sær pláss í 2. umfari í Conference League og harvið fýra milliónir í inntøku, sum er næststørsta tryggjaða inntøkan í 2025. Ístaðin tapti B36 og fær onga krónu fyri altjóða luttøku í 2025.

Jákup Martin er uppá tal?

B36 hevur fyrr í ár sett Tummas Erling Djurhuus sum ítróttarstjóra og hann váttaði fyri B36-varpinum á FM1 fyri nøkrum vikum síðani, at tað verða broytingar í B36, har felagið í nógv størri mun skal byggja sín hóp upp um lokalar leikarar. B36 hevur onkran dyst í ár spælt uttan nakran lokalan leikara í uppstillingini.

Tískil vóru broytingar væntandi óansæð úrslit í steypafinaluni, men tað kann hugsast, at broytingarnar verða enn størri nú.

B36 skal hava nýggjan venjara og leingi hevur ljóðað, at tað fór at verða ein útlendskur venjari. B36 hevur eisini havt samrøður við fleiri venjarar síðstu tíðina sambært B36-varpinum. Tað nýggjasta er tó, at tað nú ikki er vist, at tað verður nakar útlendskur venjari. Jákup Martin Joensen er síðstu tíðina javnan nevndur sum ein møguligur B36-venjari. Tað gevur eisini meining, um tað verður ein føroysk loysn. Jákup Martin var árini 2016-2018 venjari hjá U18 og tvey styttri tíðarskeið hjá næstbesta liðnum hjá B36. Eisini hevur hann verið leikari í felagnum í fleiri ár.

Jákup Martin hevur eisini eitt tilknýti til Tummas Erling, tí fyrsti hjálparvenjarin, sum Jákup Martin valdi, tá hann bleiv venjari í bestu deildini á fyrsta sinni, sum var í EB/Streymi í 2019, var Tummas Erling Djurhuus. Teir hava eisini arbeitt saman í 2016 hjá U18-liðnum hjá B36.

Á leikarasíðuni vita vit, at Andrass Johansen fer uttanlands, meðan landsliðsleikarin, Jann Benjaminsen, ongan sáttmála hevur og hevur áhuga frá fleiri feløgum. Tað ljóðar, at teir flestu útlendingarnir halda ikki fram. Teir eru:

Marius K. Lindh

Thomas Rømo Lillo

Jelle van der Heyden

Vilmer J. Rönnberg

Zean Peetz Dalügge

Anton Søjberg

Tískil kann tað blíva ein nærum nýggj byrjan hjá B36. B36 hevur eina góða ungdómsdeild, um hugt verður eftir U-landsliðsleikarum á dreingjasíðuni, tí har er B36 best umboðað í ár. Men hesir eru í stóran mun ov ungir (frá U17-landsliðnum og niður) til at fáa stóran leiklut á besta liðnum enn. Næstbesta liðið hjá B36 stóð seg væl í ár fram til síðsta triðing av kappingini við einum ungum liði, og tað er kanska har, at B36 fer at hyggja eftir fleiri leikarum. Og harafturat eru leikarar í øðrum feløgum, sum eru uppaldir í B36. Ragnar Samuelsen hjá B68 og Emil W. Joensen hjá EB/Streymi eru tveir. Bartal Páll Klein er ein annar(eisini verið í HB), men har ljóðar, at HB kanska er ein betri møguleiki, um hann velir at fara til topp 5. Jákup á Borg valdi nú at halda fram í B68, og tað kann kanska hugsast, at tað betrar um møguleikarnar hjá B68 at varðveita Bartal Páll, tí tað vóru B68 og Jákup, sum hava givið honum hendan pallin at sláa ígjøgnum í føroyskum fótbólti sum bara 17 ára gamal.