B36 hevur ikki vunnið landskappingardyst móti KÍ síðani 2020. Men ábendingar eru um, at leygardagin kann tað blíva.

Leygardagin kl. 17.00 møtast B36-KÍ í Gundadali í toppdysti, ið gott nokk er bara útfrá 1. umfari, men hyggur ein eftir metingum fyri árið, so eru hetta tvey av teimum trimum, sum tey flestu hava sett í topp 3 í ár. Tey flestu hava KÍ og Víking til at kappast um FM, men so halda summi eisini, at B36 skal uppí tann bólkin. B36-venjari og forkvinna hava eisini meldað út, at B36 ætlar sær at kappast um FM í ár og eina slíka útmelding hava vit ikki hoyrt frá B36 síðstu árini.

Bæði hava nýggjar leikarar tøkar

Bæði B36 og KÍ vunnu stórsigrar í 1. umfari, og tí er spurningurin, um broytingar verða í uppstillingunum. B36 hevur Anton Søjberg tøkan hesaferð, meðan KÍ hevur Céderic Yambere tøkan hesaferð.

Nú hevur Dan sín egna hóp

B36 hevur fingið heili átta nýggjar leikarar til hetta kappingarárið. Og tað ger, at Dan Brimsvík, sum í landskappingini byrjaði í 2021, nú hevur fingið ein B36-hóp, sum hann hevur sett saman. Tí av teimum 11 sum byrjaðu inni í 1. umfari, so hevur Dan Brimsvík ’’keypt’’ níggju síðani 2021, meðan teir báðir lokalu Andrass Johansen og Mattias Hellisdal hava fingið sítt gjøgnumbrot undir Dan Brimsvík. Andrass í 2021 og Mattias í 2023.

Kend álopsstyrki í KÍ

Meðan B36 hevur nógv nýtt fólk, sum vísti seg væl fram í 1. umfarinum, so er tað kend styrki á KÍ-liðnum í álopsspælinum. Tað eru málini hjá Pálli A. Klettskarð og tað eru uppleggini hjá Árna Frederiksberg. Umframt álopskenda høgra bakkin, Jóannes K. Danielsen, sum hevur lagt upp til mál hjá Páll báðar dystirnar higartil.

Hetta er møguleikin hjá B36

Í fjør spældu liðini tríggjar ferðir í Gundadali. B36 vann í steypakappingini, meðan KÍ vann tann eina í landskappingini við sigursmáli langt inni í yvirtíðini, meðan tann eini endaði við javnleiki. Sum heild hava dystirnir millum hesi liðini verið javnir og spennandi, hóast B36 ikki hevur vunnið landskappingardyst síðani 2020.

Flytingarvindeygað í vetur hevur helst stytt munin enn meir millum hesi liðini.

Tí nógvir viðmerkjarar hava mett, at B36 hevur havt eitt gott flytingarvindeygað, har fleiri av leikarunum gera stóran mun. B36 hevði seks nýggjar leikarar í uppstillingini seinast.

Hinvegin halda nógvir viðmerkjarar, at KÍ ikki hevur havt eitt gott flytingarvindeygað. Tað sást eisini í 1. umfari, har eingin nýggjur útileikari var í uppstillingini.

Taka vit venjingardystir og stórsteypadyst, so sóu vit, at KÍ tapti móti bæði Víkingi og HB, sum helst er eitt betri barometur enn ein heimadystur móti ÍF. B36 var næstbesta liðið eftir Víking í venjingardystunum. Eftir stórsteypadystin, har KÍ tapti 3-2 móti HB, segði viðmerkjarin í fótbóltspráti hjá KVF, Oddbjørn Joensen, at um KÍ ikki tók seg nógv fram uppá tvær vikur, so kundi roknast við, at føroyameistararnir neyvan fingu stig móti B36, sum í løtuni verður mett sum eitt væl betri lið enn HB. 

Dystargongdin

Dan Brimsvík hevur verið álopskendur í síni dagsskrá í vetur. Umframt at melda út, at B36 ætlar at spæla við um FM, so hevur hann eisini sagt, at B36 skal verða meira álopskent, eisini móti teimum bestu liðunum. Tí kann dystargongdin fara at broytast í mun til síðstu árini, har KÍ í stóran mun hevur myndað dystirnar, meðan B36 hevur spælt uppá kontraálop. Bæði liðini hava nýggjan málverja og nýggja miðverju – hjá KÍ vegna skaðar – og tað fara liðini helst at royna at vita, um tey kunnu gagnnýta.

Lagt er tí upp til ein sera spennandi og áhugaverdan dyst. Vinnur Víkingur dagin fyri, sum Víkingar eru favorittar til, so verður hetta dysturin millum hini bæði liðini um, hvør skal fylgjast við Víkingi í byrjunarspurtinum í kappingini.