KÍ kom í bólkaspæl í ár, men á pappírinum er møguleikin nógv størri fyri hesum komandi ár.

KÍ vann seg í bólkaspælið við at sláa meistararnar úr Ungarn og Svøríki út úr Champions League. Tað eru úrslit sum føroyskur felagsfótbóltur ongantíð áður hevur fingið. So kunnu fleiri freistast at siga, at um hetta eru krøvini fyri at koma í eitt bólkaspæl, so hendur tað ikki ofta aftur.

Men umstøður og kappingarleistir broytast. Fyri at koma í eitt bólkaspæl aftur verður møguliga als ikki neyðugt við so torførum vegi.

Nýggjur kappingarleistur

Kappingarleisturin fyri altjóða kappingar broytist frá 2024, men áðrenn bólkaspælið broytist hann lítið. Í bólkaspælinum í Conference League broytist tað við, at tað verður kappast í størri bólkum, har ein bara møtir einum felag einaferð, men framvegis spælir seks dystir. Í Champions League og Europa League bólkaspølunum er sama skipan, men við átta dystum í bólkaspælinum, harav tvey umfør eru í januar.

Undan bólkaspælinum er tað blivið eitt lítið vet lættari hjá meistarunum at koma í bólkaspæl, tí fleiri lið (36 ímun til núverandi 32) sleppa í bólkaspølini í teimum trimum kappingunum. Tað ger m.a., at færri lið byrja í 1. umfari og tað merkir, at onkur av teimum bestu liðunum, sum man kundi møta, nú ikki verða møgulig at møta. Harafturat eru tey vánaligastu liðini við í 1. umfari og ikki sum áðrenn, har tey spældu eina undankapping, har eitt av fýra liðum slapp í 1. umfar.

KÍ verður styrkismett

Men tann stóri munurin er, at KÍ sum meistari nú verður styrkismett í 1. umfari í Champions League. Hetta kemst av, at KÍ í ár hevur lagt so nógv styrkisstig afturat sínum tali og kemur at hava ágóðan av hesum árinum komandi minst fýra árini í styrkismetingini óansæð hvørjari altjóða kapping. Ongantíð áður síðani Conference League kom í 2021 hevur eitt føroyskt lið verið styrkismett í 1. umfari, og tí er møguleikin á pappírinum fyri einum bólkaspæli ongantíð størri enn í 2024. Tí 1. umfar er rættuliga avgerandi, tí kemur ein víðari úr tí umfarinum, so skal ein altíð í Europa League áðrenn Conference League. Tá er bara neyðugt at vinna ein dyst afturat eins og KÍ gjørdi í 2023. Men vinnur man ikki 1. umfar, so fer man beint í Conference League, og tá er neyðugt at vinna tilsamans tríggjar dystir samanlagt fyri at koma í bólkaspæl.

Mótstøðuliðini

Enn eru bara kalendarakappingarnar lidnar spældar, so tað eru fá lið, sum eru komin á listan, men í nógvum kappingum teknar seg ein mynd av, hvør fer at luttaka í 1. umfari í Champions League. Hyggja vit so eftir hvørji mótstøðuliðini væntast at verða hjá KÍ, so eru tað meistarar í londum sum San Marino, Andorra, Albania, Montenegro, Malta, Luksemborg, Norðurmakedónia, Ísland, Litava, Hvítarussland, Slovenia og Georgia. Harafturat er møguleiki fyri Bulgaria, men ikki um eitt av stóru feløgunum vinnur og Kasakhstan, men landafrøðiliga plaga føroysk og íslendsk lið ikki at hava møguleika at trekkja lið úr Kasakhstan í 1. umfari vegna longu frástøðuna. Tað er eisini møguleiki fyri hjá KÍ at møta meistarunum á Gibraltar, men so krevst, at oddaliðið Lincoln Red Imps ikki vinnur meistaraheitið. Onkrar aðrar brotingar kunnu eisini koma, um óvæntað lið vinna meistaraheitið, men sum ikki liggja til tað í løtuni.

Meta vit leystliga so er KÍ kanska favorittur móti meistarunum úr San Marino, Andorra, Montenegro og Malta. Tað er kanska 50/50 móti meistarunum úr Luksemborg, Norðurmakedónia, Íslandi og Litava. Meðan KÍ hevur realistiskan møguleika, men ikki er favorittur móti meistarunum úr Albania, Hvítaruslandi, Slovenia og Georgia. Har hevur KÍ síðstu árini vunni stórsigrar á heimavølli móti meistarunum úr Slovenia og Georgia, men eisini tapt á útivølli móti meistarunum úr Slovenia, meðan útidysturin móti meistarunum úr Georgia ikki var á skrá vegna koronu.

Samanumtikið er talan sostatt nærum bara um mótstøðu, sum á pappírinum gevur KÍ realistiskan møguleika at vinna seg víðari úr 1. umfari og næstan útihýsir møguleikum við á pappírinum nógv betri liðum sum komu við ikki at verða styrkismettir sum Slovan Bratislava (2020), Bodø/Glimt (2022) og Ferencváros (2023).

KÍ á markinum til styrkismeting í 2. umfari

KÍ er á markinum til at verða styrkismett til 2. umfar í Champions League. Og kann tað hava nakran týdning? Jú tað kann tað hava, tí lutakastið til 2. umfar í Champions League er áðrenn 1. umfar er spælt. Endaðu allar kappingarnar nú, so hevði KÍ verið styrkismett sum tað síðsta liðið, men vinna favorittarnir, so verður KÍ ikki styrkismett. Men KÍ hevur framvegis ein møguleika at blíva styrkismett við vissu og tað er at fáa stig í Lille. Tað hevði gjørt, at KÍ fekk meira styrkisstig enn meistararnir úr Estlandi og Rumenia (oddaliðið FCB). KÍ hevur fingið 3 styrkisstig fyri 2023, men kemur uppá 4 stig við javnleiki og 5 stig við sigri. Niðanfyri eru styrkismetingarnar, um kappingarnar endaðu í dag.