Tríggir venjarar í felagnum hava sagt seg úr starvi innan stutta tíð, og nú er spurningurin, um høvuðsvenjarin verður sitandi leingi afturat.

In.fo skrivaði í gjár og í dag, at hjálparvenjarin Jákup Martin Joensen, málmansvenjarin Magnus Emil Poulsen og 1.deildarvenjarin Hegga Samuelsen allir eru givnir í HB síðstu tíðina. In.fo skrivar, at kreppufundur verður í HB í morgin, har støðan verður viðgjørd. 

Dalibor Savic er høvuðsvenjari hjá HB og sum skilst er hann komin undir trýst í HB nú. Fyrst tapti HB greitt ein venjingardyst móti KÍ áðrenn landsliðssteðgin. Síðani hevur verið ein landsliðssteðgur, har svenski HB-venjarin hevur verið í heimlandinum í 10-11 dagar. Í landsliðsssteðgi er ikki so óvanligt, at slíkt hendur, so tað er ikki vist, at tað hevur nakran týðandi leiklut. Dalibor Savic kemur aftur til landið seinni í hesi vikuni, men tá er venjaratoymið hjá HB minkað við tveimum venjarum umframt, at venjarin á næstbesta liðnum hevur sagt upp fyri stuttari tíð síðani.

HB spælir mánakvøldið móti B36, og spenningur er um, hvørs Dalibor Savic verður høvuðsvenjari hjá HB til tann dystin. Tveir møguleikar eru. Annar er, at HB-leiðslan vísir venjaranum álit og bakkar hann upp fyri at síggja, hvønn veg tað ber og um ófriðurin rundanum steðgar samstundis sum úrslitini blíva nøktandi. Hin er, at høvuðsvenjarin fær sekkin. Hendir hetta seinna, so er Jákup Martin Joensen helst besta boðið uppá ein avloysara.