Tað ganga helst tvær-tríggjar vikur, áðrenn ein úrskurður kemur.

Bolt.fo hevur fingið upplýst, at kæran frá B68 fer í Aganevndina. Tað eru mannagongdir, har feløgini skulu hoyrast o.s.v., har tey fáa nakrar dagar at svara, og vanliga ganga tvær-tríggjar vikur, áðrenn ein úrskurður kemur frá Aganevndini í kærum.

Málið snýr seg um, at B36 hevur brúkt 17 ára gamla Tobias Hansen í trimum deildum sama leikumfar. Hann bleiv innskiftur allar tríggjar dystirnar sambært dómaraseðlum. Tað er nógv sum bendur á, at hetta er ólógligt. Er tað tað, so eru mál, sum líkjast frá 2018 og 2021, sum hava givið revsing at lið hava tapt 3-0 á skriviborðinum. Kemur tað hartil, so er spurningurin, hvørja deild revsingin fer at raka. Í fótbóltsumhvørvinum hevur tað frá teimum flestu ljóðað, at tað er altíð lægsta deildin, sum fær revsingina. Men spurningurin er, um tað er galdandi fyri eitt líknandi mál. Vit hava ikki funnið nakað líknandi mál, har lægsta deildin fær revsingina, men frætta fegin frá lesarum á bolt@bolt.fo, um tað finnast slík mál. Úrskurðirnir frá 2018 og 2021 góvu revsing til bæði lægstu deild og tað liðið, sum spældi síðst, tí í báðum førum var tað sama lið, sum var bæði lægsta deild og sum spældi síðst.

Í niðurstøðuni í líknandi kærumáli frá 2021 stendur rættiliga greitt:

‘’Aganevndin leggur áherðslu á, at rættarfylgjan fyri brúk av ólógligum leikara natúrliga fellir í tí deild og dysti, sum brotið er framt í’’

Útfrá hesum kundi tað bent á, at tað er í tí triðja dystinum, tá brotið verður framt, at eisini revsingin kemur at umfata. Um so er, so verður tað Betri Deildin hjá B36, sum kemur at tapa móti B68. Spurningarnir og ivamálini eru helst nógv fleiri, enn vit hava viðgjørt, og tað er alt hetta, sum komandi vikurnar verða brúktar til, áðrenn ein úrskurður frá Aganevndini kemur. Og eftir tað er helst eisini ein møguleiki fyri, at málið endar í Yvirkærunevndini.

Málið hevur stóran týdning fyri seks av liðunum í deildini, um vit siga, at topp 3 og nr. 10 longu er avgjørt. B36 kappast við EB/Streym um 4. pláss, sum mest sannlíkt gevur síðsta Evropaplássið, meðan B68 kappast um at sleppa undan niðurflyting móti NSÍ, AB og 07 Vestur. Helst ganga tvey umfør, áðrenn ein úrskurður kemur. Eftir komandi tvey umførini er ein landsliðssteðgur í tvær vikur.