(Samrøða) Zoran Pavlovic, nýggjur venjari hjá TB, sigur, at størsti trupulleikin hjá TB er at tað mangla leikarar.

52 ára gamli Zoran Pavlovic var partur av TB í 1997 og 1998, tá hann eisini eitt skiftið var venjari. Zoran hevur verið í TB í nakrar vikur. Stóri trupulleikin í TB er, at tað eru ov fáir leikarar.

- Tað eru 12 leikarar til venjing og vit hava kanska bara 8-9 góðar leikarar, so vit mangla leikarar. Vit hava havt ein íslendskan leikara til venjing, men vita ikki, hvussu verður við honum. Vónandi fáa vit 2-3 leikarar inn afturat, men eg veit ikki, um tað fer at eydnast. Vit mangla ein verjuleikara og ein álopsleikara, sigur Zoran Pavlovic við bolt.fo. Hann væntar, at Tormóður P. Djurhuus verður leigaður frá HB. Hann hevur spælt nakrar venjingardystir við TB. Eisini væntar og vónar Zoran, at Teitur Olsen verður við.

Vil ikki seta málsetning á

Zoran sigur, at støðið í Føroyum er nógv vaksið.

- Støðið í Føroyum er nógv vaksið seinastu árini. Her eru nógvir góðir leikarar og nógvir góðir venjarar. Vit taka stig fyri stig. Tað viktigasta er, at vit arbeiða hart og trúgva uppá okkum sjálvar og trúgva uppá okkum sum eitt lið, sigur Zoran Pavlovic. TB hevur eina skrá, sum ger, at liðið hevur sínar væntaðu kappingarneytar – AB, ÍF og EB/Streymur – fyrstu fýra umførini.

- Byrjanin er sera týdningarmikil, men tað eru allir dystir, sigur Zoran Pavlovic. Hann væntar, at FM kappingin fer at standa millum HB, B36 og KÍ, tó at hann ikki vil avskriva møguleikanum fyri onkrum óvæntaðum í FM stríðnum. 

Sonurin er í KÍ

Sonurin hjá Zoran Pavlovic spælir í KÍ, og tað verður verður nakað serligt at spæla móti honum í KÍ.

- Eg havi verið venjari hjá Deni Pavlovic í Reyðu Stjørnu og har vann tann árgangurin meistaraheitið. Hann hevur góð evnir, er professionellur og er millum bestu verjuleikararnar í føroysku kappingini. Fótbóltur er serligur, og tað verður serligt hjá okkum at spæla ímóti honum og KÍ, sigur Zoran Pavlovic at enda við bolt.fo.