Her eru møguleikarnir í botngysaranum leygardagin, har eitt av 07 Vestur, AB og Skála skal tungu leiðina niður í 1.deild.

B68 var eitt kappingarført lið, men flutti niður í 26. umfari við 20 stigum fyri 26 umfør. Vit skulu aftur til fyrsta árið í 2005 við 27 umførum fyri at finna eitt ár sambært FaroeSoccer, har nummar 10 fekk fleiri stig enn 19. Tá fekk TB 22 stig á 10. plássi. So vinnur B68 á NSÍ, so setur nummar 10 met við stigum í ár.

Fleiri møguleikar

Tað er sera spennandi um hin niðurflytaran. Trý lið hava 25 stig og tvey av teimum møtast, meðan hitt spælir móti liðnum á 6. plássi, ið tó einki hevur at spæla fyri. Dystirnir eru AB-07 Vestur og EB/Streymur-Skála.

Hvørjir eru so møguleikarnir hjá 07 Vestur, Skála og AB? Fyrst er at siga, at tey øll hava sína lagnu í egnum hondum, so tey liðini sum vinna sínar dystir halda fram í bestu deildini.

AB og Skála klára seg eisini við javnleiki. Tapur Skála, so er nokk við javnleiki hjá 07 Vestri eisini.

Málmunurin kann blíva avgerandi

Men tað eru eisini nakrir møguleikar, har tað fer heilt niður til málmunin. Skála, AB og 07 Vestur hava øll 25 stig. Málmunurin hjá teimum er:

-13: Skála (30-43)

-14: AB (33-47)

-17: 07 Vestur (26-43)

Tað merkir, at tapur Skála við einum máli, so kann Skála ikki innheintast, um AB-07 Vestur ikki endar við javnleiki. Men tapur Skála við tveimum málum uttan at skora minst trý mál, so klárar AB seg við eittmálstapi. T.d. um Skála tapur 2-0 og AB tapur 1-0, so flytir Skála niður, tí AB hevur skorað fleiri mál.

Ein møguleiki er eisini, at liðini enda púra jøvn. Tað verður t.d. um Skála tapur 5-3 og AB tapur 1-0 ella Skála tapur 6-4 og AB tapur 2-1. Um tað kemur hartil, so siga reglarnir hjá FSF hetta:

Grein 5 Stk. 5.:

Burtursæð frá ásetingunum í stk. 3 og 4 verður raðfylgjan í lands- og steypakappingini funnin soleiðis:

1. Stendur á jøvnum í stigum, er uppmøtingin til dystir avgerandi, og um liðini hava møtt líka væl upp, er samlaði málmunurin avgerðandi.

2. Stendur á jøvnum eftir a), er tað liðið fremst, sum hevur flest vunnin mál.

3. Stendur framvegis á jøvnum verður umdystur leiktur á uttanveltaðum vølli, um neyðugt við longdari leiktíð og brotssparkskapping.