Bara eitt stig skal til ella at KÍ ikki fær fult, so er NSÍ FM-vinnari á heimavølli í dag.

NSÍ fær vitjan av HB við Løkin. HB spælir fyri at fáa síðsta Conference League plássið og kann nærum tryggja seg tað við javnleiki, tí málmunurin er so nógv betri enn hjá B36. Og javnleikur er eisini nokk hjá NSÍ. Hjá NSÍ kann enntá longu verða nóg mikið av stigum til at vinna FM í dag, tí fær KÍ ikki fulla úrtøku í Gundadali móti B36 uttan leikbannaða Árna Frederiksberg, so hevur NSÍ ikki brúk fyri fleiri stigum.

NSÍ bjóðar øllum í gulum ókeypis til dystin, sum kann staðfesta annað FM-heitið í søgu felagsins. Tað higartil einasta kom í 2007.

B68 skal møguliga standa heiðursrekkju (Guard of Honour)

Vinnur NSÍ FM í dag, so skulu grannarnir úr B68 møguliga standa heiðursrekkju undan síðsta dystinum á Svangaskarði, um teir velja tað. Tað er komið í føroyskan fótbólt síðstu árini, tó at tað ikki er nakað krav, og er upp til hvørt lið, um teir gera tað ella ikki. Tað eru deildar meiningar í føroyskum fótbólti, um hetta er góður stílur ella púra óneyðugt. Í fótbólti verður tað brúkt m.a. í Onglandi, tá eitt lið heiðrar eitt annað lið, sum hevur vunnið meistaraheitið. Leikararnir hjá mótstøðuliðnum standa í tveimum røðum og klappa, meðan meistararnir ganga inn á vøllin millum teirra. Hetta verður vanliga gjørt undan fyrsta dystinum, eftir at eitt lið hevur tryggjað sær meistaraheitið.

Allir dystirnir í dag byrja kl. 15.00.