Maltesiska felagið Hamrun Spartans hevur fingið eina stóra revsing frá UEFA eftir dystin móti NSÍ í Conference League í summar. Felagið skal rinda umleið 380.000 krónur í bót, og fýra persónar í felagnum hava fingið leikbann. Ein teirra er leiðari í felagnum, sum fekk fimm dystir leikbann fyri millum annað álop á ein dystarleiðara.

NSÍ vann 2-1 á Hamrun Spartans á Malta tann 16. juli og tryggjaði sær harvið víðari luttøku í Conference League við samlaða úrslitinum 3-2.

Men dysturin fekk eisini avleiðingar fyri maltesiska felagið uttan fyri vøllin, tá rok var eftir dystin, tí heimaliðið kendi seg skeivt dømt av einum serligum máli í yvirtíðini, tá NSÍ fekk brotsspark og skoraði.

Sambært disiplineravgerð hjá UEFA frá 19. august hevur Hamrun Spartans fingið bøtur fyri tilsamans umleið 380.000 føroyskar krónur.

Størsta einstaka bótin er upp á umleið 193.000 krónur fyri, at lutir vórðu kastaðir.

Felagið fekk eisini umleið 75.000 krónur í bót fyri at vísa ein boðskap, sum sambært UEFA ikki hoyrir heima á einum ítróttartiltaki, og fyri at seta fótbóltin og UEFA í ringt ljós.

Harumframt fekk Hamrun Spartans umleið 60.000 krónur í bót fyri at forða almennum gonguleiðum og umleið 52.000 krónur fyri óhóskandi atburð hjá liðnum.

Fýra persónar kring felagið revsaðir

Umframt bøturnar hava fýra persónar við tilknýti til Hamrun Spartans fingið persónlig leikbann.

Gilbert Camilleri, sum er liðleiðari hjá felagnum, og Jason Mangani, sum er hjálparliðleiðari, hava fingið ein UEFA-dyst leikbann í part fyri óítróttarligan atburð.

Stefano Fava, sum eisini er knýttur at felagnum, hevur fingið ein UEFA-dyst leikbann fyri at hava nýtt niðrandi ella ókvæmisorð móti einum dystarleiðara.

Harðastu revsingina fekk Victor Cassar, sum hevur ábyrgd av altjóða viðurskiftum hjá Hamrun Spartans.

Hann hevur fingið fimm UEFA-dystir leikbann. Sambært UEFA er revsingin givin fyri bæði niðrandi ella ókvæmisorð móti einum dystarleiðara og fyri álop á ein dystarleiðara.

UEFA greiðir ikki nærri frá sjálvari hendingini í stuttu avgerðini, og tí er ikki greitt, hvussu álopið fór fram.

Stór rokning eftir tapið móti NSÍ

Tað er sostatt ein dýrur dystur, sum Hamrun Spartans spældi móti NSÍ í summar.

Umframt at maltesiska felagið varð útsligið úr Conference League, skal tað nú rinda umleið 380.000 krónur í bøtum, samstundis sum fleiri av starvsfólkunum kring liðið hava fingið leikbann.

Avgerðin varð tikin av aganevndini hjá UEFA tann 19. august 2026.