Tá Føroyar og Kasakhstan hittast á Tórsvølli leygardagin, verður talan um fyrsta dystin hjá nýggja landsliðsvenjaranum hjá Kasakhstan. Hollendingurin John van ’t Schip hevur eina drúgva yrkisleið aftan fyri seg, og í samrøðu við Kasakhstanska Fótbóltssambandið undan dystinum leggur hann dent á bæði Føroyadystin og longu ferðina til Føroya.

John van ’t Schip varð í august settur sum nýggjur landsliðsvenjari hjá Kasakhstan. Fyrsti dysturin hjá 62 ára gamla hollendinginum í starvinum verður sostatt Nations League-dysturin móti Føroyum á Tórsvølli leygarkvøldið.

Van ’t Schip er eitt kent navn í hollendskum fótbólti. Sum leikari spældi hann í nógv ár við Ajax og var partur av hollendska landsliðnum, sum vann EM í 1988. Síðani hevur hann havt eina drúgva venjarayrkisleið og hevur millum annað verið venjari hjá Ajax, Twente og Melbourne City umframt landsliðsvenjari hjá Grikkalandi.

Nevnir longu ferðina til Føroya

Í einari samrøðu við pressutænastuna hjá Kasakhstanska Fótbóltssambandinum, sum fleiri kasakhstanskir miðlar hava endurgivið, sigur van ’t Schip, at fyrsta uppgávan hevur stóran týdning.

– Fyrsti dysturin hjá okkum móti Føroyum verður týdningarmikil. Tað er ein long ferð til útidystin. Síðani skulu vit spæla úti móti Slovakia, sigur John van ’t Schip.

Hann metir Slovakia sum favoritt í bólkinum og vísir í hesum sambandi til FIFA-styrkislistan. Men hann vil ikki brúka nógva orku upp á Slovakia enn.

– Tað týdningarmesta er at hava fokus á fyrsta dystinum, sum er móti Føroyum. Beint nú hava vit veruliga fokus á tí og á okkara egnu spæliætlan, sum vit vilja seta í verk í liðnum so líðandi, sigur hann við KFF.

Fýra dystir innan 12 dagar

Ferðin til Føroya er bara byrjanin upp á eina sera tætta skrá hjá Kasakhstan. Eftir dystin á Tórsvølli 26. september skal Kasakhstan spæla í Slovakia 29. september. Síðani bíða heimadystir móti Moldova 2. oktober og Føroyum 6. oktober.

Van ’t Schip sigur við KFF, at hetta verður krevjandi fyri leikararnar.

– Tað verða ikki lættir dystir hjá okkum, men tað verður eisini trupult hjá mótstøðuliðunum. Tað verður hart hjá leikarunum at spæla fýra dystir innan 12 dagar. Leikararnir mugu vera klárir til tað, sigur hann.

Kasakhstan hevur tí úttikið ein stóran hóp við 28 leikarum.

– Eg havi sagt við allar leikararnar, at teir skulu vera klárir, tí vit fara at fáa brúk fyri øllum, sigur van ’t Schip í samrøðuni við KFF.

Arbeiðir við nýggjari spæliætlan

Tá van ’t Schip varð kunngjørdur sum landsliðsvenjari í august, segði hann á tíðindafundi hjá KFF, at hann vil hava eitt lið, sum spælir álopskendan fótbólt, men samstundis er skipað og disciplinerað.

Tað verður nú fyri fyrstu ferð møguligt at síggja, hvussu hesar ætlanir síggja út í einum dysti. Fyrsta royndin hjá John van ’t Schip sum landsliðsvenjari hjá Kasakhstan verður á Tórsvølli móti Føroyum leygardagin kl. 17.00.

Nýggi venjarin fær ikki allar sínar bestu leikarar við til Føroya. Kasakhstan verður uttan offensivu profilarnar Dastan Satpayev og Islam Chesnokov, meðan royndi verjuleikarin Alibek Kasym eisini er skaddur og ikki verður við á Tórsvølli.