Vit tippa teir fimm dystirnar.

B68-EB/Streymur

Hetta er helst síðsti møguleikin hjá B68, tí eftir hendan dystin eru tríggir av fýra dystum móti topp 5 liðum. Tí er trýstið stórt á heimaliðið, sum spælir uttan liðskiparan Hanus Højgaard. EB/Streymur manglar helst ein sigur afturat fyri at bjarga sær og við einum tapi kemur liðið longu aftur undir trýst hóast flotta sigurin á B36. Fyrr í ár endaði dysturin á Svangaskarði við javnleiki millum hesi bæði. Javnleik kann B68 ikki brúka nú, og tað kann blíva ein fyrimunur fyri EB/Streym. Tipping: 2 (1-2)

HB-AB

HB er uttan liðskiparan í miðverjuni Per Magnus Steiring. AB hevur fýra stig móti HB higartil, men síðani tá er gongdin hjá báðum vend. AB hevur bara vunnið ein dyst eftir summarsteðgin, meðan HB er formsterkasta liðið í deildini. AB er enn ikki tryggjað í deildini, meðan HB spælir fyri at vinna síðsta altjóða plássið. Tipping: 1 (3-1)

B36-NSÍ

B36 vísti síðsta dyst móti EB/Streymi, hvussu stórur munur er á topp- og botnstigi hjá liðnum. Liðið var áveg móti einum at síggja til tryggum sigri, men avrikið í seinna hálvleiki var nokk eitt tað vánaligasta, sum vit hava sæð frá B36 móti einum botn 5 liði í nógv ár. 14-3 í málroyndum søgdu hagtølini fyri seinna hálvleik, sum EB/Streymur eisini vann 2-0. NSÍ fekk eina keðiliga byrjan móti Víkingi, men yvirlivdi og var í seinna hálvleiki nærri sigrinum. Nú kemur Petur Knudsen viðaftur, og tað fer at styrkja munandi um. Tipping: 2 (1-3)

KÍ-Skála

Í fyrra hálvleiki vóru ábendingar um, at ein venjaraeffekt kundi koma á KÍ, men tá KÍ ikki fekk mál nummar tvey, so javnaði dysturin seg út, og tað var nær við, at 07 Vestur javnaði í seinna hálvleiki. Skála er í eini góðari gongd og hevur ikki tapt í fýra dystum á rað og hevur av álvara notið gott av eini venjarabroyting. Fyrr í ár spældu liðini javnleik í Klaksvík. Á heimavølli skal KÍ vinna ein slíkan dyst, men tað verður tepurt útfrá tí, sum KÍ og Skála hava avrikað síðstu tíðina. Tipping: 1 (1-0)

Víkingur-07 Vestur

Víkingur verður torført at meta um restina av kappingini, tí yvirskipað er einki av týdningi at spæla fyri. 07 Vestur spælir fyri lívinum í deildini, men hevur tvey leikbann. Síðstu innanhýsis dystirnir millum hesi liðini hava verið spennandi og tveir av síðstu trimum dystunum í Sarpugerði eru endaðir 0-0. Ein torførur dystur at meta um, tí Víkingur er eitt betri lið og hevur heimavøll, meðan 07 Vestur hevur sera nógv meira at spæla fyri. Tipping: 1 (1-0)