(Greining) Lokala sólskinssøgan hjá Víkingi heldur fram.

Tað var í endanum av kappingarárinum 2020, at ferð skuldi setast á, at Víkingur í størri mun skuldi byggja á sítt egna lokala tilfeingi, tá Jóhan Petur Poulsen bleiv fluttur sum høvuðsvenjari frá 1.deild, har hann hevði vant teir flestu lokalu yngri leikararnar, til MeistaraDeildina. Og tað hevur verið hildið orð, tí síðstu árini hevur Víkingur verið lokalasta liðið í deildini og kanska ongantíð so lokalt sum júst í finaluni um løgmanssteypið í ár, har Víkingur uppiborið vann 2-0 á KÍ, tí tá vóru níggju av teimum 11, sum byrjaðu inni, lokalir.

Ungt lið

Ari Olsen, Gunnar Vatnhamar, Árni Nóa Atlason, Géza Dávid Turi, Olaf Bárðarson, Poul Kallsberg og Aron Benjaminsen. Teir høvdu givið ein sterkan bul, men teir vóru ikki við, tí teir tey síðstu árini eru farnir uttanlands at royna seg. Víkingur er tað liðið, sum síðstu árini hevur útflutt flestar leikarar. Les meir um tað HER

Sølvi Vatnhamar er elsti leikarin í deildini sum 40 ára gamal og dregur miðalaldurin nógv upp, men í finaluni var miðalaldurin fyri hinar 10 leikararnar 21,7 ár. Til samanberingar vóru fimm av teimum 10 útileikarunum hjá KÍ 33 ár ella eldri.

Harði vegurin inná liðið

At Víkingur hevur eitt so greitt og væl koyrandi konsept skyldast einum hørðum og longum arbeiði, sum byrjaði fyri nógvum árum síðani, men sum hevur sligið fult út síðstu árini.

Ein uppskrift er, at leikararnir verða ’’brýndir’’ á næstbesta liðnum. Áðrenn ein leikari slær til á besta liðnum, so hevur hann næstan altíð minst 40 dystir í næstbestu deildini. Les og hoyr meir um tað HER. Og á næstbesta liðnum avrika hesir leikararnir væl, tí Víkingur er tað liðið av eykaliðunum í 1.deild, sum yvir longri tíðarskeið hevur staðið seg nógv best eisini í úrslitum. Tað síggja vit aftur í ár, hóast Víkingur hevur útflutt sjey leikarar og hevur lokalasta liðið í bestu deildini, so er tað Víkingur, sum er størsta hóttanin til B71 til at vinna 1.deild.

Steyp leggjast afturat

Samstundis sum alt hetta gongur fyri seg, so leggjast steyp afturat. Tað byrjaði í 2022 við óvæntaða sigrinum á KÍ, sum tapti fyrsta dystin tað kappingarárið í tí síðsta dystinum. Fýra leikarar frá tí uppstillingini byrjaðu inni aftur hesaferð. Síðani kom eitt flott FM í 2024, har níggju av leikarunum, sum spældu í gjár, eisini fingu spælitíð.

Síðstu árini hevur Víkingur eisini mist nakrar av mest royndu leikarunum sum Atla Gregersen, Andreas L. Olsen og Finn Justinussen, og tí hevur tað helst stóran týdning, at ein Sølvi Vatnhamar, sum hevur verið ársins leikari í deildini fýra ferðir og toppskjútti tvær ferðir, framvegis er við og gongur á odda, tá metrarnir skulu rennast í einum dysti. Við hansara nú 10 FM/løgmanssteypum og øll fyri sama felag er hann fyrimyndin, sum teir ungu kunnu spegla sær í.

Bjørt framtíð

Tað er torført at spáa um framtíðina, men nógv bendur á, at Víkingur hevur eina gylta framtíð. Hópurin er ungur og svangur, leikararnir uttanlands fara einaferð at koma heim aftur at geva liðnum royndirnar, tá Sølvi og aðrir eru givnir, og ungdómsdeildin blómar, har Víkingur liggur í toppstríðnum í øllum deildum og er millum feløgini við flest U-landsliðsleikarum.