Gunnar Vatnhamar er nú Vejle-leikari, og 31 ára gamli føroyski landsliðsleikarin fer úr íslendskum fótbólti við sera góðum skoðsmálum.

Vejle kunngjørdi mikumorgunin, at felagið hevur keypt Gunnar Vatnhamar úr Víkingi Reykjavík. Hann hevur skrivað undir sáttmála, sum er galdandi fram til summarið 2029.

Gunnar hevur spælt í Íslandi síðani 2023, og íslendsku miðlarnir eru ikki sparnir við rósi, nú hann takkar fyri seg.

Fótbolti.net skrivar í sambandi við skiftið, at Gunnar hevur verið ein av bestu leikarunum í Bestu deildini, síðani hann kom til Íslands. Miðilin staðfestir eisini, at hann hevur verið á ársins liði hjá Fótbolti.net í øllum trimum heilu kappingarárunum – 2023, 2024 og 2025.

Tá tað í august kom fram, at Gunnar var á veg úr Víkingi, skrivaði miðilin Visir, at føroyingurin í tíðini í Íslandi hevur verið „einn albesti varnarmaður Bestu deildarinnar“ – ein av allarbestu verjuleikarunum í bestu íslendsku deildini.

Venjarin hjá Víkingi, Sölvi Geir Ottesen, hevur eisini givið Gunnari eitt framúr skoðsmál. Hann hevur róst bæði leikaranum og persóninum Gunnari og lýst hann sum ein stóran stríðsmann og vinnara.

– Vit missa fyrst og fremst ein sera góðan persón, sum hevur lagt lív og sál í hetta. Hann er ein fyrimynd á og uttan fyri vøllin, ein stórur stríðsmaður og vinnari, segði Sölvi Geir sambært Fótbolta.net í sambandi við skiftið.

Tá Gunnar spældi sín seinasta heimadyst fyri Víking, segði Sölvi Geir eisini, at Gunnar hevði sett síni týðiligu spor í søguna hjá felagnum. Hann vísti á øll heitini, sum Gunnar hevur vunnið, og rósti honum samstundis sum einum framúr persóni, sum tað fór at verða torført at siga farvæl við.

Og tað var ikki bara við orðum, at Gunnar fekk viðurkenning í sínum seinasta heimadysti. Víkingur vann 2-0 á Val, og Fótbolti.net valdi Gunnar Vatnhamar til besta leikara í dystinum.

Víkingur sjálvt staðfestir eisini stóra leiklutin hjá føroyinginum. Í fráboðanini um søluna skrivar íslendska meistarafelagið, at Gunnar hevur verið ein sera týdningarmikil partur av liðnum heilt frá fyrsta dystinum í 2023.

Gunnar fer úr Víkingi við 119 dystum og 12 málum. Hann gjørdist íslendskur meistari í 2023 og 2025 og steypavinnari í 2023.

Nú bíðar ein nýggj avbjóðing í Vejle. Ítróttarstjórin hjá danska felagnum, Mikkel Hemmersam, sigur við heimasíðuna hjá Vejle, at Vejle fær ein leikara við royndum, sterkum karakteri og greiðum leiðaraeginleikum. Hann nevnir eisini ró, fysikk og disiplin sum styrkir hjá føroyska verjuleikaranum.

Sambært upplýsingum hjá bolt.fo, so liggur prísurin um tríggjar milliónir, sum Vejle hevur goldið.

Tá Gunnar skifti til Víking Reykjavík í 2023 lá Ísland á 48. plássi á UEFA-styrkislistanum. Nú 2. september 2026 liggur Ísland á 31. plássi á sama lista, sum verður roknaður fyri úrslit síðstu fimm árini.