Riga FC hevur fleiri ferðir verið heilt nær bólka- ella deildarspælinum
Skrivað : Jákup Ósá | 19-08-2026 11:34
KÍ fær hóskvøldið vitjan av einum felagi, sum hóast sína stuttu søgu longu hevur fingið nógvar royndir í evropeiskum fótbólti. Riga FC úr Lettlandi hevur spælt í Evropa á hvørjum ári síðani 2018 og hevur fleiri ferðir verið heilt frammi við dyrnar til eitt evropeiskt deildarspæl.
Riga FC varð stovnað í 2014, og longu í 2018 kom felagið fyrstu ferð út í Evropa. Fyrsta royndin endaði við einum sera javnari uppgerð móti CSKA Sofia. Báðir dystirnir endaðu 1-0 til heimaliðið, og bulgarska felagið vann til endans brotssparkskappingina.
Árið eftir kom fyrsta veruliga evropeiska ævintýrið. Riga spældi 0-0 í báðum Champions League-dystunum móti Dundalk og tapti aftur eftir brotsspørk. Í Europa League sló Riga síðani bæði Piast Gliwice og HJK Helsinki út. Í røkkstøkk bíðaði FCK.
Riga vann 1-0 heima móti FCK, men tapið 1-3 í Parkini merkti, at lettiska felagið tapti 3-2 samanlagt. Tað er framvegis eitt av úrslitunum, sum vísir, at Riga kann vera torført at hava við at gera á heimavølli.
Fleiri norðurlendsk lið á listanum
Riga FC hevur møtt fleiri liðum, sum føroyingar kenna væl.
Í 2021 spældi Riga móti Malmö FF í Champions League. Malmö vann fyrra dystin 1-0, meðan tað endaði 1-1 í Riga. Síðani fór Riga yvir í Conference League, har Shkëndija úr Norðurmakedónia og Hibernians úr Skotlandi vóru bast.
Harvið var Riga aftur bara eitt umfar frá einum evropeiskum bólkaspæli. Men Lincoln Red Imps úr Gibraltar gjørdist endastøðin. Eftir 1-1 í Riga vann Lincoln 3-1 eftir longda leiktíð á Gibraltar. Riga hevði hetta árið tríggjar sigrar, tveir javnleikir og eitt tap í Conference League fram til play-off.
Í 2022 var Riga aftur sannførandi fyrstu umførini. Derry City úr Írlandi varð sligið út 4-0 samanlagt og Ružomberok úr Slovakia 5-1. Portugisiska Gil Vicente var tó ov sterkt í 3. umfari og vann 5-1 samanlagt.
Árið eftir kom eitt íslendskt lið á vitjan. Riga vann 2-0 á Víkingi Reykjavík heima, og hóast Víkingur vann returdystin 1-0, fór Riga víðari. Síðani varð Kecskemét úr Ungarn bast 4-3 samanlagt eftir longda leiktíð, áðrenn sterka hollendska liðið Twente vann báðar dystirnar og 5-0 samanlagt.
Nær við aftur í fjør
2024 gjørdist ferðin styttri. Riga vann 1-0 heima móti ?l?sk Wroc?aw, men tapti 3-1 í Póllandi og fór út.
Í fjør, 2025, gekk nógv betur. Dila Gori úr Kosovo var bast 5-4 samanlagt, og síðani vann Riga 3-0 heima móti Beitar Jerusalem úr Ísrael. Hóast 1-3 tap í returdystinum var tað nóg mikið til enn eitt røkkstøkk umfar.
Har bíðaði Sparta Prag úr Kekkia. Riga tapti 2-0 í Prag, men vann returdystin í Riga 1-0. Enn einaferð var Riga sostatt sera nær við at røkka deildarspælinum.
Hevur vunnið fýra Europa-uppgerðir á rað
Í summar byrjaði Riga FC í Champions League, har Ararat-Armenia úr Armenia vann 4-3 samanlagt.
Síðani er gongdin tó vend. Í Conference League vann Riga báðar dystirnar móti Vardar úr Norðurmakedónia – 3-2 úti og 5-2 heima, ella 8-4 samanlagt. Har skal sigast, at í seinna dystinum í Riga vann Vardar 2-1 í vanligu leiktíðini, men Riga vann heili 4-0 í longdu leiktíðini.
Í 3. umfari bíðaði Gy?ri ETO úr Ungarn. Riga vann 1-0 á Skonto Stadium og spældi 1-1 í Ungarn. Harvið vann Riga 2-1 samanlagt og tryggjaði sær røkkstøkk móti KÍ. UEFA skrásetur Riga við 10 málum og fimm ímóti í teimum fýra Conference League-dystunum higartil í summar.
KÍ kann forða teimum aftur
Søgan hjá Riga FC í Evropa hevur tí eitt rættiliga greitt mynstur. Felagið hevur ofta megnað at spælt seg gjøgnum fyrstu undankappingarumførini, men hevur enn ongantíð rokkið einum evropeiskum bólka- ella deildarspæli.
2019: út móti FC København í Europa League røkkstøkk.
2021: út móti Lincoln Red Imps í Conference League røkkstøkk.
2025: út móti Sparta Prag í Conference League røkkstøkk.
2026: KÍ stendur nú millum Riga FC og fyrsta deildarspælið í søgu felagsins.
Riga hevur tó eisini prógvað, at felagið kann fáa úrslit móti góðari mótstøðu. Teir hava vunnið heimadystir móti eitt nú FC København, Beitar Jerusalem og Sparta Prag, meðan Malmö FF bara fekk 1-1 í Riga.
Hóskvøldið verður fyrsta uppgerðin móti KÍ á Djúpumýru. Returdysturin verður eina viku seinni í Riga, og vinnarin samanlagt fær pláss í Conference League-deildarspælinum.
Umrøðan av altjóða dystunum hjá KÍ í 2026 er gjørd í samstarvi við:
.jpeg)
2.jpg)
