Liðið hjá Gunnari Vatnhamari fer komandi vikuna at spæla avgerandi røkkstøkkdystir.

Víkingur Reykjavík møtir Borac Banja Luka úr Bosnia & Hersegovina. Greingafyritøkur meta hesa uppgerðina rættiliga javna. Fyrr í dag skrivaðu vit, at ''Í Víkingi Reykjavík kemur tað væl við, at landskappingardystur hjá felagnum er útsettur í vikuskiftinum og tí spæla íslendsku meistararnir ikki í heimligu kappingini millum røkkstøkkdystirnar.'' Eftir at greinin kom út hevur íslendska fótbóltssambandið gjørt eina broyting. Sí niðast í greinini.

Nærum øll lond sum byrja at spæla altjóða dystir í 1. ella 2. undanumfari hava skipanir, har ein ella tveir dystir kunnu útsetast í tíðarskeiðnum fram til og við røkkstøkkdystunum. Føroyar hava ikki eina slíka skipan, men í KVF sunnukvøldið segði aðalskrivarin í FSF, Kristin Dam Ziska, at hetta er nakað sum mann fer at hyggja uppá í vetur, og tí er ikki óhugsandi, at hetta verður broytt framyvir.

Íslenskir miðilin fotbolti.net skrivar, at Gunnar Vatnhamar væntandi skiftir til danska felagið Vejle síðst í hesum mánaðinum.

Fotbolti.net skrivar soleiðsi um broytingarnar í dag:

Víkingur Reykjavík hevur fingið landskappingardystin móti KR flutt vegna luttøkuna í Conference League play-off. Dysturin skuldi spælast sunnudagin 30. august, men verður í staðin spældur týsdagin 1. september. Sostatt fær Víkingur tveir eyka hvílidagar eftir útidystin móti Borac Banja Luka í Bosnia 27. august. Tað merkir, at KSÍ hevur seinastu árini havt eina praksis, har íslendsk Europa-lið kunnu fáa heimligar dystir fluttar fyri at lætta um dystarbyrðuna.

Men í hesum førinum er ein áhugaverd broyting: Upprunaliga hevði KSÍ flutt Víkingur–Valur 23. august til 2. september, so Víkingur skuldi hava frí millum báðar Borac-dystirnar. Henda flytingin varð tikin aftur. Tí spæla teir:

20. august: Víkingur–Borac
23. august: Víkingur–Valur
27. august: Borac–Víkingur
1. september: KR–Víkingur (fluttur frá 30. august)

Dagføring 20. august kl. 12.55:

Fotbolti.net skrivar í dag hósdagin 20. august meir um hetta, har víst verður á, at Víkingur Reykjavík sjálvt hevur valt at broyta skránna, har annars eingin dystur lá millum røkkstøkkdystirnar. 

Fotbolti.net skrivar:

Víkingur valdi dystin millum Europa-dystirnar – vil heldur hava hvíld eftir ferðina

Tað vakti ans í Íslandi, tá greitt varð, at Víkingur Reykjavík kortini skal spæla landskappingardyst millum báðar Conference League play-off-dystirnar móti Borac Banja Luka. Nú greiðir venjarin frá, hví íslendska felagið sjálvt valdi hesa loysnina.

Vanliga siðvenjan í Íslandi hevur verið, at íslendsk feløg, sum koma í røkkstøkk í Evropa, fáa landskappingardystin millum báðar Europa-dystirnar útsettan. Víkingur hevði eisini møguleikan hesaferð, men felagið valdi heldur at flyta dystin, sum skuldi spælast eftir returdystin.

Tí spælir Víkingur fyrst móti Borac á heimavølli í kvøld, síðani móti Vali í landskappingini sunnukvøldið og so returdystin í Bosnia hóskvøldið 27. august.

Upprunaliga skuldi Víkingur longu spæla útidyst móti KR sunnudagin 30. august – bara tríggjar dagar eftir dystin í Banja Luka. Hesin dysturin er nú fluttur til týsdagin 1. september.

Ferðin úr Bosnia avgerandi

Sölvi Geir Ottesen, venjari hjá Víkingi, greiðir við Fótbolti.net frá, at tað serliga er heimferðin úr Bosnia og Hersegovina, sum liggur aftanfyri avgerðina.

– Tað er fyrst og fremst vegna heimferðina. Hetta er ein brutal ferð, sigur Sölvi Geir Ottesen við íslendska miðilin.

Venjarin vísir á, at tað hevði verið sera torført hjá leikarunum at komið fyri seg aftur til ein landskappingardyst bara fáar dagar eftir returdystin. Harumframt væntar hann øðrvísi undirlag, nógvan hita og eina krevjandi ferð heim úr Bosnia. Tí metti Víkingur, at tað var betri at spæla móti Vali millum Europa-dystirnar og í staðin fáa tveir eyka dagar undan KR-dystinum.

Skráin hjá Víkingi verður sostatt:

20. august: Víkingur–Borac, Conference League
23. august: Víkingur–Valur, landskappingin
27. august: Borac–Víkingur, Conference League
1. september: KR–Víkingur, landskappingin
6. september: Víkingur–Fram, landskappingin.

Tað áhugaverda í hesum sambandi er, at Víkingur ikki er noytt at spæla millum Europa-dystirnar. Sambært Fótbolti.net hevur siðvenjan seinnu árini verið, at íslendsku Europa-feløgini fáa møguleika at útseta landskappingardystin millum røkkstøkkdystirnar. Hesaferð hevur Víkingur sjálvt valt at leggja hvíldina aftan á returdystin í staðin.

Greinin er dagførd 20. august kl. 12.55