NSÍ skal hóskvøldið royna seg ímóti einum av sterkastu liðunum í Sveis, tá FC Lugano tekur ímóti við nýggja heimavøllin, AIL Arena, ið tekur gott 8.000 áskoðarar.

Lugano endaði nummar trý í sveisiska Super League í farna kappingarári. Liðið fekk 67 stig í 38 dystum – bert átta stig færri enn meistararnir úr Thun. Lugano vann 19 dystir, spældi tíggju javnar og tapti níggju. Málmunurin var 59-42.

Triðja plássið tryggjaði Lugano luttøku í Conference League, har sveisiska felagið kom inn í øðrum undanumfari.

Greiður sigur á Dukagjini

Vegurin hjá Lugano til triðja undanumfar gekk um kosovska felagið KF Dukagjini.

Fyrri dysturin varð spældur á nýggja heimavøllinum hjá Lugano 23. juli. Lugano vann dystin 1-0 og hevði tí eina tepra leiðslu við sær til Kosovo.

Í seinna dystinum í Pristina var eingin ivi. Lugano vann heili 5-1 og samanlagt 6-1.

Eitt av fremstu liðunum í Sveis

FC Lugano varð stovnað í 1908 og hevur heimstað í italsktalandi partinum av Sveis, nær við markið til Italia.

Felagið hevur vunnið sveisiska meistaraheitið tríggjar ferðir og steypakappingina fýra ferðir. Seinasti stóri heiðurin kom í 2022, tá Lugano vann sveisiska steypið.

Lugano hevur seinastu árini verið fastur partur av toppinum í sveisiska fótbóltinum. Felagið gjørdist nummar tvey í 2023/24, nummar fýra í 2024/25 og nummar trý í 2025/26.

Liðið verður vant av 43 ára gamla Mattia Croci-Torti, sum hevur verið høvuðsvenjari síðani 2021.

Byrjað væl í heimligu kappingini

Nýggja kappingarárið í Sveis er longu byrjað. Lugano vann fyrsta dystin 2-1 á uppflytarunum úr Vaduz og fylgdi síðani sigrinum upp við at vinna 4-1 á útivølli ímóti Grasshoppers.

Saman við teimum báðum sigrunum á Dukagjini merkir tað, at Lugano hevur vunnið allar sínar fyrstu fýra almennu dystir í kappingarárinum.

Dysturin í Lugano hóskvøldið byrjar kl. 19.30.