Ongantíð áður hevur eitt føroyskt lið vunnið seg víðari í altjóða fótbólti eftir at hava tapt fyrra dystin á heimavølli við tveimum málum ella meir.

Tað gjørdist kanska minniligasti dystur í søguni hjá NSÍ, tá NSÍ í Koper í Slovenia í kvøld spældi seg víðari í Conference League. NSÍ tapti 2-0 á heimavølli, so tað skuldi nakað óvanligt til fyri at venda tí.

Fyrsta partin av fyrra hálvleiki var einki sum bendi á tað, tí heimaliðið var omaná og brendi m.a. eitt brotsspark, men NSÍ kom betri og betri við í dystin. Og í 35. minutti legði Beinir Nolsøe NSÍ á odda eftir hornasparksstøðu. Í 70. minutti økti Marius K. Lindh til 2-0 og so stóð á jøvnum samanlagt.

Í longdu leiktíðini var heimaliðið omaná, men brotssparkið sá út til at verða skeivt dømt, sum sendi FC Koper á sigurskós. Men síðsta orðið var ikki sagt, tí í síðstu sekundunum av yvirtíðini av longdu leiktíðini javnaði Michal Przybylski.

Løgin brotssparkskapping koppaði til NSÍ

Til brotssparkskapping hevur liðið, sum er komið afturíuaftur í dystinum ofta bestu kortini sálarliga. Tað bleiv ein løgin brotssparkskapping. Tvær ferðir gliðu leikarar og skutu í beini á sær sjálvum. Stóra stjørnan hjá FC Koper, 38 ára gamli Josip Iicic, brendi við panenka. Tom Amos bjargaði 6. brotssparkinum og so hevði NSÍ vunnið hendan minniliga dystin, sum hevði tað mesta. Eitt sera flott avrik sum ger, at NSÍ skal møta Lugano úr Sveis í 3. umfari, har útidystur stendur at verða fyrst. Fyri at koma víðari fær NSÍ eisini 2,8 milliónir, so samanlagt hevur NSÍ nú fingið 8,0 milliónir í summar og stendur sum føroyska liðið, sum hevur staðið seg best í altjóða fótbólti hetta summarið.