Komandi vikurnar kunnu vit vænta fleiri leikaraflytingar.

Síðani flytingarvindeygað lat aftur í mars, so eru umstøðurnar hjá fleiri feløgum nakað broyttar, og tað ávirkar eisini flytingarvindeygað í summar, sum letur upp 15. juni.

Hjá B36 er longu alment kent, at Torgeir Børven er farin aftur til Norra, meðan Pætur Petersen kemur aftur úr Danmark. Síðani er greitt, at Tobias Hansen fer av landinum fyrst í august, meðan Jóhann Hansson er langtíðarskaddur og spælir ikki aftur í ár. Ítróttarstjórin í B36, Jákup á Borg, sigur við bolt.fo, at í B36 er ætlanin at styrkja hópin við einum álopsleikara afturat Pæturi.

Hjá HB er nakað síðani, at Erik Sorga gavst. Og har hevur ætlanin verið at styrkt hópin við minst einum álopskendum leikara. Í sjey av 12 dystum hevur HB skorað hægst eitt mál.

Hjá NSÍ skrivaðu vit fyrr í vikuni, at Adrian Edqvist er givin. Tað letur helst upp fyri møguleikanum at fáa styrk inn. Siðstu árini hava vit sæð, at NSÍ m.a. hevur gjørt broytingar við útlendkum leikarum, ið eru komnir og farnir.

Hjá KÍ frætta vit frá góðum keldum, at arbeitt verður við at fáa ein nýggjan málverja í hópin. Sebastian John spælir ikki aftur í ár og tí hevur KÍ bara ein royndan málverja. Í fjør sóu vit longu í fyrsta umfari, at brúk bleiv fyri eykamálverjanum, tá fyrsti málverjin fekk heilaskjálvta. KÍ hevur 28 sáttmálar, men í eina tíð hevur verið greitt, at fýra av teimum spæla ikki aftur í 2026 vegna skaðar.

Í Víkingi hevur bæði KVF og bolt.fo skrivað um, at útlendskur áhugi er fyri Aron Benjaminsen. Flytingarvindeygað í Føroyum liggur keðiliga fyri fleiri viðurskifti. M.a. kann Aron Benjaminsen ikki spæla altjóða dystirnar lidnar fyri síðani at skifta, um Víkingur skal fáa avloysara inn ístaðin, tí flytingarvindeygað stongir tveir dagar áðrenn seinna dystin í fyrsta umfari í Conferemnce League. Tað skal ikki avskrivast, at onkrar flytingar kunnu blíva í Víkingi.

07 Vestur hevur fingið nýggjan venjara og ítróttarstjórin, Jón Nordendal segði við FM1 sunnukvøldið, at hugt verður eftir at styrkja liðið, men hann segði eisini, at fíggjarligu fortreytirnar fyri at reka 07 Vestur broyttust munandi síðsta heyst, og at tað hevur givið nakrar avbjóðingar.

Hjá B68 hevur ljóðað, at fyrrverandi liðskiparin Aleksandur Ó. Jensen møguliga kemur aftur, meðan tað enn hevur verið friðarligt hjá AB, Skála og EB/Streymi. EB/Streymur plagar ofta at fáa styrk um summarið og við tætta botnstríðnum í huga er tað eisini hugsandi í summar.

Flytingarvindeygað letur upp 15. juni og er opið fram til 14. juli.