Í dag og í kvøld verða fjórðingsfinalurnar í kappingini um løgmanssteypið leiktar. Tríggir stórfavorittar eru, meðan tann eini dysturin er meira spennandi á pappírinum.

Í Trongisvági tekur TB ímóti 07 Vestur kl. 15.00. Her er ein deild á muni, men TB hevur heimavøll og spælir sín størsta dyst hetta kappingarárið. Mangan hava liðini havt tað torført í Trongisvági. 07 Vestur er stórfavorittur at koma í hálvfinaluna, men møguleikarnir hjá TB skulu ikki avskrivast heilt. TB fær her møguleikan at síggja, á hvørjum stigi teir eru á í mun til eitt lið, sum teir mest sannlíkt skulu kappast móti um eitt ár.

Í Gundadali fær HB vitjan av AB kl. 18.00. Her koma liðini bæði við nýggjum venjarum í mun til seinast. HB hevur sent sín venjara til hús, meðan AB-venjarin hevur sagt upp. HB hevur funnið nýggja venjaran, meðan AB ikki hevur funnið sín. Og meðan fráfarandi HB-venjarin einki fekk at rigga síðstu dystirnar, so hevði AB-venjarin fingið AB-liðið at rigga og úrslitini síðstu tíðina vóru so mikið góð, at AB sum uppflytari liggur á 6. plássi. Tí er mest sannlíkt, at venjarabroytingarnar fyrstu tíðina fara at hava góða ávirkan á HB og tað øvugta hjá AB. HB er stórfavorittur at koma víðari.

Í Klaksvík er KÍ størsti favoritturin av øllum í dystinum móti ÍF kl. 18.30. Oddaliðið í Betri Deildini tekur ímóti oddaliðnum í 1.deild. Tað finnast neyvan nógvir fuglfirðingar, sum hava trúnna uppá at koma víðari. Síðstu árini hevur KÍ sum oftast vunnið greiðar sigrar móti ÍF og hesaferð er møguleiki fyri, at hesin sigurin verður enn størri. Tí ÍF hevur í ár fleiri ungar leikarar á liðnum, sum nærum ongar royndir hava at spæla móti slíkari mótstøðu, meðan KÍ hevur ein hóp, har kapping er um plássini og har leikararnir sum fáa møguleikan skulu vísa, at teir eiga rættin til spælitíð framyvir. Men KÍ møtir Víkingi sunnudagin í toppdysti, og tað kann gera, at tankarnir fara á tann dystin, tá hesin dysturin er avgjørdur, og so sleppur ÍF kanska undan einum heilt ljótum úrsliti.

Mest spennandi dysturin verður á Tórsvølli kl. 20.00. Tá tekur B36 móti Víkingi. B36 byrjaði illa og gjørdi einki við KÍ, HB og Víking og skoraði ikki so frætt sum eitt mál. Men síðani hevur liðið vent gongdini og í hinum dystunum hevur liðið fingið fult stigatal burtursæð frá javnleiki á Skála. B36 hevur spælt væl og skora nógv mál, har nógvir leikarar hava víst seg fram í álopspartinum. Nú kemur stóra royndin, um B36 fær bjóða teimum bestu av. Tí Víkingur er flúgvandi og kann sunnudagin vinna seg heilt inní meistarastríðið. Vit hava kanska aldrin sæð Víking spælt so væl sum í ár, og álopsspælið er fjølbroytt. Sølvi Vatnhamar, Bárður J. Hansen og Olaf Bárðarson taka kanska yvirskriftirnar, men har eru eisini nógvir aðrir, ið spæla væl. Víkingur hevur toppdyst móti KÍ sunnudagin og spurningurin er so, um tann dysturin fyllir nakað til hendan dystin. Skulu onkrir leikarar spæla færri minuttir av hesum og verða onkrir leikarar við snuddum spardir? Undir øllum umstøðum er lagt upp til ein spennandi dyst millum tvey lið, sum spæla við høgum sjálvsáliti og sum hava borgað fyri sera góðum álopsspæli síðstu vikurnar. Víkingur er favorittur, men B36 hevur eisini realistiskan møguleika at koma víðari. Seinast fekk Víkingur lætt spæl móti B36, men tað fáa teir neyvan hesaferð.