Um tað verður ein, tveir ella fleiri, dugur ítróttarstjórin tó enn ikki at siga.

Tað hevur verið nakað stór frágongd í NSÍ í vetur. Seks leikarar eru farnir, harav tríggir-fýra, sum hoyrdu til byrjunaruppstillingina. NSÍ hevur eisini fingið tilgongd og serliga tilgongdin av Tróndi Jensen hevur fingið nógva umtalu. Hann var áðrenn skaðan, ið hann fekk í 2019, millum mest eyðsýndu miðvallarleikararnar í deildini, tá hann spældi við HB. Harafturat er Sjúrður Pauli Nielsen, sum spældi væl í ÍF í fjør, komin aftur til barndómsfelagið. Eyðstein Skipanes er ítróttarstjóri í NSÍ og hann sigur, at tað kemur meira styrkur.

- Vit fáa nokk onkran styrk afturat. Har kann man hyggja eftir, hvar vit hava mist fólk. Men fyrst skal venjarin síggja hópin, og tað eru ungir leikarar, sum hann ikki fekk sæð í fjør, tí hann var so stutt í felagnum tá. Vit vilja, at okkara egnu leikarar fáa møguleikan, men samstundis vilja vit hava eitt gott lið, sum skal kappast í toppinum, og tá krevst styrkur til, sigur Eyðstein Skipanes við bolt.fo. Hann dugur ikki at seta tal á, hvussu nógvur styrkur kemur afturat, tí har spælir tað inn, hvussu leikararnir fara at standa seg undir venjing og í venjingardystum hesar komandi vikurnar.

Eftirspurningur at leiga leikarar

NSÍ hevur síðstu árini eisini havt sítt næstbesta lið í toppinum í 1.deild við ungum leikarum. Onnur feløg hava eisini fleiri ferðir leigað leikarar frá NSÍ. M.a. hevur NSÍ ein eykamálverja í Karstin Hansen, sum áður hevur verið á Skála, har hann kom á A-landsliðið.

- Tað hava verið fyrispurningar um fleiri leikarar. Tá er mannagongdin tann, at vit boða leikarunum frá hesum og so taka vit í felag eina niðurstøðu, hvat best er at gera, sigur Eyðstein Skipanes.

Tilgongd:

Tróndur Jensen

Sjúrður Pauli Nielsen

Frágongd:

Jann Benjaminsen

Salmundur Bech

Steffan A. Løkin

Bárður J. Hansen

Rógvi Egilstoft

Jesper Christjansen