Hjálparpakkin hjá donsku stjórnuni hjálpir fótbóltsfeløgunum, sum eru komin illa fyri av koronakreppuni.

Í Danmark hava fleiri av feløgunum tað ikki gott fíggjarliga í hesi koronakreppuni. Kappingin er steðgað upp og eins og alla aðrastaðni er sera ógreitt, nær hon verður tikin uppaftur. Hetta ger, at feløgini onga inntøku hava og ógreitt er, um feløgini fáa allar sjónvarpspengarnar, um kappingin ikki verður spæld liðug við øllum dystunum. Hesir sjónvarspengarnir hava stóran týdning fyri donsku feløgini fíggjarliga.

Feløgini senda starvsfólk og leikarar til hús

Flestu av donsku feløgunum hava sent starvsfólk til hús, sum síðani kunnu fáa løn umvegis hjálparpakkan hjá landinum. Nøkur feløg m.a. Hobro, Lyngby, SønderjyskE, Esbjerg og AC Horsens hava sent leikararnar til hús umframt fleiri feløg í næstbestu deildini. Afturfyri yvirtekur landið uppgávuna at gjalda lønir til hesar leikarar og hesi starvsfólk, men hinvegin hava feløgini tá ikki krav uppá at seta nøkur krøv til hesar leikarar. Tað stendur tá leikaruum frítt, hvussu teir venja og um teir yvirhøvur venja.

- Vit senda starvsfólkini (leikararnar) heim í hesi støðuni, tí vit halda tað vera mest ábyrgdarfult yvirfyri okkara starvsfólkum, men eisini móti samfelagnum sum heild. Eingin av okkara leikarum skal útsetast fyri smittuvanda og harvið váða at blíva smittuberarar. Tí hava vit sent teir heim til at passa uppá seg sjálvar og sínar familjur. Heilustøðan hjá okkara starvsfólkum hevur hægstu raðfesting, og tí taka vit hetta stóra stigið. Vit eru sum so mong onnur nógv ávirkað av hesi støðuni og okkara tankar fara sjálvandi til øll tey, sum hava koronasmittuna tætt uppat lívinum, sigur Bo Henriksen, venjari hjá AC Horsens, í einum tíðindaskrivi. Hjá fleiri øðrum feløgum verður fíggjarliga støðan mett at vera avgerandi. M.a. skrivar Kolding, sum spælir í næstbestu deildini, at felagið hevur sent starvsfólk og leikarar til hús fyri at koma heilskapað gjøgnum koronakreppuna soleiðis, at starvsfólk og leikarar eisini hava eitt starv, tá kreppan er av.

Landið hjálpir

Í Danmark er ein hjálparpakki møguligur at fáa hjá leikarum og starvsfólkum í fótbóltsfeløgum, sum vera sendir heim frá feløgunum. Tað ger at teir hesa tíðina fáa fulla løn frá landinum, meðan tað hjálpir til hjá fótbóltsfeløgunum at kunna bjóða teimum aftur í starv, tá koronakreppan er av. 

Bolt.fo hevur havt samband við nøkur føroysk feløg og sum skilst verður í løtuni kannað, hvørjir møguleikar eru hjá føroysku feløgunum. Í Føroyum hava vit eitt sindur øðrvísi samanseting av leikarum, tí tað eru leikarar, sum liva av fótbóltinum fulla tíð, hálva tíð og so er ein stórur partur, sum hevur fulltíðarstarv viðsíðuna av sáttmálanum frá fótbóltinum. Teir sum liva av fótbóltinum antin fulla ella hálva tíð eru fyri tað mesta útlendingar.