B36-leikari hevur eftir øllum at døma spælt við trimum deildum sama leikumfar, ið ikki er lógligt.

17 ára gamli Tobias Hansen fekk í dag sínar fyrstu minuttir á besta liðnum hjá B36, tá B36 vann 3-1 á B68. Hann kom á vøllin í 90. minutti. Sami leikari kom í gjár inn í 15. minutti hjá 1.deild hjá B36, sum tapti 1-0 móti ÍF, um dómaraseðilin er rættur. Og seinni í gjár byrjaði hann á bonkinum hjá U17 í dysti móti KÍ, sum endaði 2-2. Sum bolt.fo hevur fingið upplýst frá álítandi keldum, so kom hann á vøllin hendan dystin, men dómaraseðilin frá tí dystinum er ikki endaliga skrásettur enn, so tað kann ikki skjalprógvast enn. (Dagført 05.09 kl. 09.17: Dysturin er nú skrásettur á comet-skipanini og har sást, at hesin leikarin kom inn og var millum málskjúttarnar. Sí mynd niðast.

Reglugerðin sigur, at leikari hevur ikki loyvið at spæla við trimum deildum sama leikumfar.

Í grein 8 stendur:

Stk. 2. Tað er bert loyvt leikara at leika ein dyst hvønn leikdag, sí tó stk. 3 og 4. Tó er loyvt leikara í lægri vaksnamannadeild, at verða eykaleikari í hægri vaksnamannadeild sama leikdag. Víst verður annars til grein 9.

Stk. 3. Leikari sum ikki er fyltur 21 ár 1. januar í kappingarárinum, kann leika tveir dystir sama leikdag, tó er ikki loyvt leikara, sum byrjar inni í Meistaradeildini, at leika við U21 sama leikdag. Víst verður annars til grein 9.

Stk. 4. Fríggjadagur, leygardagur, sunnudagur og mánadagur verða roknaðir sum ein leikdagur, eins og týsdagur, mikudagur og hósdagur verða roknaðir sum ein leikdagur.

Um Tobias Hansen hevur leikt við trimum deildum sama umfar, sum alt bendur á, so er sannlíkt, at eitt lið hjá B36 verður dømt at tapa, um kært verður ella um starvsnevndin velur at viðgera málið, tí í Agareglugerðin gr. 7 stendur: “Starvsnevnd FSF’s kann nær sum helst viðgera eitthvørt mál, sum kemur til hennara kunnleika og sum er fevnt av grein 2, og biðja aganevndina um at viðgera málið sum kærumál samsvarandi hesi reglugerð.”

Spurningurin er bara, hvat lið tað verður, sum fer at tapa, um hesin leikarin heur spælt í trimum deildum sama leikumfar, sum allar upplýsingarnar benda á. Sum bolt.fo hevur fingið upplýst frá fólkum, ið kenna til siðvenjur fyrr á økinum, so er tað lægsta deildin, sum í hesum føri er U17, sum tapir. Men fordømi er uppá sama brot í fjør, tá ÍF bleiv dømt at tapa U21 vegna ólógligar leikarar. Har stendur í úrskurðinum: ''Rættarfylgjan fyri brúk av ólógligum leikara rakar tann dystin, sum brotið er framt í.'' Í tí førinum var U21 dysturin bæði lægsta deild og síðsti dysturin, sum leikarin leikti í. Les tann úrskurðin HER

Í 2018 var eisini eitt líknandi mál, har skrivað verður í úrskurðinum, at leikari var at meta ólógligur í triðja dystinum. Har stendur eisini í niðurstøðuni at ‘’Aganevndin leggur áherðslu á, at rættarfylgjan fyri brúk av ólógligum leikara natúrliga fellir í tí deild og dysti, sum brotið er framt í.’’Les tann úrskurðin HER

Sí dómaraseðlar niðanfyri.

Greinin er seinast dagførd 05.09.22 kl. 09.17.