B71 er rakt av koronu og alt bendur á, at uppflytingarfinalan millum B71-AB verður útsett.

Karl Vidtfeldt er formaður í B71 og hann váttar, at B71 er rakt av koronu.

- Tað er nakað av koronu á Sandoynni og eisini í onkrari familju hjá leikarum. Tískil kravdi lækni, at allur hópurin hjá okkum skuldi kannast. Har hevur tað víst seg, at minst tveir leikarar hava koronu og tveir aðrir leikarar eru koyrdir í sóttarhald. Enn hava vit ikki fingið svar uppá øll úrslitini, so tað kann vera, at enn fleiri eru raktir. Vit hava sent FSF boð um okkara støðu og eg dugi ikki at ímynda mær, at nakar dystur verður leygardagin, sigur Karl Vidtfeldt við bolt.fo.

Talan er um leikarar, sum hava spælt nógv á B71-liðnum í ár. Tveir av hesum fýra leikarunum eru ikki koppsettir.

Harmast støðuna

Formaðurin í B71 heldur, at tað er óheppin støða.

- Nú eru vit komin har til, at vit ynskja at fáa kappingina lidna. Vit spæla um uppflyting og vita, at hava vit ein góðan dag, so kunnu vit flyta upp. Tað hevur verið nógv tosað um fótbólt á Sandoynni hesa síðstu vikuna, so hetta er óheppið fyri allar partar, sigur Karl Vidtfeldt við bolt.fo.

Verður dysturin útsettur, sum nógv bendur á, serliga tá vit hava fordømi, so verður dysturin í fyrsta lagi leiktur 6. november og møguliga seinni enn tað.