Í dag hava feløgini fingið uppskot um, hvussu spælast skal í Betri Deildini hjá monnum.

Talan er um uppskot, sum feløgini hava fingið til viðmerkingar. Tí kunnu broytingar koma. Niðanfyri nevna vit nøkur av týdningarmiklastu tíðspunktunum, sum tað hevur eydnast at fingið upplýst.

Sjáldan dystir mitt í viku

1.umfar byrjar 9. mai. Síðani verður fyrsta miðvikuumfar um mánaðarskiftið mai/juni. Í juni verður eitt miðvikuumfar og í juli verða 1/8 finalurnar í kappingini um løgmanssteypið eitt miðvikuumfar. Summarsteðgurin verður í juli, men er styttur niður í 14 dagar. Síðst í oktober verður aftur eitt miðvikuumfar. Sum heild er talan um eina skrá, har liðini sjáldan skulu spæla mitt í viku, um skráin heldur.

Eingir landsdystir og dystir í november

At landsdystirnir í juni ikki vera leiktir ger, at tvey umfør kunnu spælast, tá kappingin annars skuldi liggja still. At stytta um summarsteðgin ger eisini, at tvey umfør kunnu spælast har. Síðani eru tvey tey síðstu umførini løgd fyrst í november, áðrenn landsliðssteðgin hálvan november. Europa-dystirnir eru enn ikki ásettir av UEFA meir enn, at teir mest sannlíkt eru útsettir í minsta lagi í nakrar vikur. Men tað hevur ikki eydnast okkum at fingið upplýst, um hesir møguliga kunnu flyta okkurt umfar hjá teimum luttakandi har. 

Steypafinalan í desember

Landskappingin líkist sostatt nógv undanfarnu árum. Bara við styttri summarsteðgi og einari viku út í november. Tað sum brýtur heilt frá vanligum kappingarári er kappingin um løgmanssteypið. Endaspælið frá fjórðingsfinalu og úteftir verður frá 21. november til 5. desember, tá steypafinalan verður leikt. Í mun til onnur ár, so verður bara ein hálvfinala, sum verður leikt á uttanveltaðum vølli. Okkum hevur ikki eydnast at fingið upplýst, um tað verður á Tórsvølli ella um tað verður á øðrum leikvøllum. Við at enda kappingarári við steypafinaluni verður givið hægst møguleikar fyri, at áskoðarar kunnu fáa møguleikan at sleppa til steypafinaluna.

Skulu vera klár uppá styttri kapping

Kappingin verður eisini nakað broytt í mun til upprunaligu kappingina við tað at liðini fyrst spæla 18 dystir, har ein er móti hvørjum heima og úti. Síðani verður tann triðingurin, sum vanliga er fyrst, leiktur seinast. Kappingin verður eftirmett eftir nøkur umfør. Lagt er upp fyri, at heilir hópar kunnu enda í sóttarhaldi, har útsettu dystirnir síðani kunnu spælast seinni, men verða hóparnir ofta raktir soleiðis, so verður kanska neyðugt at stytta kappingina niður til 18 umfør. Hetta kann eisini henda, um tiltøk hjá myndugleikunum forða fyri dystum. Tí eru fortreytirnar hjá liðunum, at sum støðan er í løtuni, so er ætlanin at spæla 27 dystir, men at umstøðurnar seinni kunnu gera, at tað bara vera spæld 18 umfør. 

Spjaða dystirnar

Fyrstu umførini vera spæld uttan áskoðarar, og tá dettur grundgevingin burtur at spæla dagar, sum samla flest fólk á leikvøllinum. Skráin leggur upp til, at flestu umførini vera spæld yvir tveir dagar. Sum vit hava skilt, so verða tíðspunktini eisini ymisk, so at so nógv fólk sum møguligt sleppa at síggja so nógvar dystir í sjónvarpi sum møguligt.

Sum sagt fyrst í greinini, so er talan um eitt uppskot, sum er sent til hoyringar, og tí kunnu broytingar koma. Sum skilst byrjar 1.deild aftur 16. mai og Betri Deildin kvinnur 24. mai.

Um tað er núverandi kapping, sum byrjar 9. mai við 10. umfari er enn okkum ógreitt. Men um tað er so, so verður síðsta umfar eftir skránni hetta 7. november:

AB-NSÍ

Víkingur-KÍ

HB-Skála

ÍF-EB/Streymur

B36-TB

Verður neyðugt at stytta kappingina niður til 18 umfør, so verður síðsta umfar tað sama, bara við nýggjum heimaliði.

EB/Streymur-ÍF

TB-B36

Skála-HB

KÍ-Víkingur

NSÍ-AB