(NSÍ-vika á bolt.fo) NSÍ hevur fingið tríggjar nýggjar leikarar uttanífrá til hópin í ár.

Umframt at NSÍ hevur gjørt ungdómssáttmálar við nógvar leikarar úr egnum rekkum, so eru tríggir nýggir leikarar uttanífrá komnir. Talan er um ein útlendskan leikara og so tveir leikarar við fitt av royndum úr bestu deildini.

Oddur skal avloysa Jens

Í miðverjuni hjá NSÍ er Jens Joensen givin og NSÍ fann skjótt ein miðverja, sum skuldi taka hetta plássið. Ítróttarstjórin hjá NSÍ, Eyðstein Skipanes, segði soleiðis um nýggja leikaran við heimasíðuna hjá NSÍ.

- Oddur er ein stórur og sterkur miðverji, ið hevur spælt ógvuliga væl í EB/Streymi í ár. Tá Jens Joensen herfyri boðaði frá, at hann fyribils gevst við fótbólti á hægsta stigi, so mettu vit, at neyðugt varð at styrkja verjuna, og valið fall á Oddur, segði Eyðstein Skipanes. Oddur er 29 ára gamal og hevur sambært FaroeSoccer spælt tilsamans 109 dystir og skorað 8 mál í bestu deildini fyri EB/Streym og barndómsfelagið B68.

Norskur miðvallaleikari fyrstu ferð í Føroyum

Í mun til hópin, sum byrjaði í fjør, so eru tveir royndir miðvallarleikarar ikki við. Karl Løkin hevur skift felag, meðan Fróði Benjaminsen neyvan spælir við NSÍ í ár. Til miðvøllin er komin norski Peder Nersveen. Peder royndarvandi í NSÍ í nakrar dagar og spældi eisini ein venjingardyst. Og sambært heimasíðuni hjá NSÍ vísti hann so mikið, at mett verður, at hann verður ein styrkur fyri hópin. Talan er um 26 ára gamlan leikara, sum í 2018 spældi við HamKam í næstbestu norsku deildini, har m.a. fyrrverandi B36 liðskiparin Odmar Færø nú spælir. Talan er um leikara, sum sambært Transfermarkt.com hevur spælt 76 dystir í næstbestu norsku deildini og sum kann røkja tey flestu plássini í bæði verju og á miðvølli. Hann hevur flestar royndir sum høgri bakkur, men síðsta árið hevur hann spælt nógv á sentrala miðvøllinum. Í HamKam var hann nógv inn og út av liðnum. Í 2018 spældi hann 24 dystir fyri HamKam, meðan hann frammanundan hevur spælt øll árini við barndómsfelagnum Elverum í lægri deildum. Bæði feløgini liggja í sama øki í Noregi.

Búi gevur álopspartinum møguleikar

Til álopspartin er komin Búi Egilsson úr Vági. Hann hevur frammanundan bara spælt í Suðuroynni, tey síðstu árini fyri felagsliðið TB/FCS/Royn. Búi royndarvandi við NSÍ og fekk sáttmála stutt eftir. 23 ára gamli leikarin, sum spælir bæði sum álopsleikari og vongur, hevur verið millum mest eyðsýndu leikararnar í álopspartinum hjá liðnum úr Suðuroynni. Í 2018 hevði hann 11 mál stig (mál og upplegg tilsamans) og í 2017 hevði hann 13 málstig. Í 2018 átti hann flest upplegg á liðnum (7) og í 2017 var hann toppskjútti á liðnum (10). Tilsamans er Búi sambært FaroeSoccer skrásettur fyri 78 dystir og 16 mál í bestu deildini. Í 2018 spældi hann tveir U21 landsdystir. Sambært InStat er talan um leikara, sum ofta hevði flestar ella næstflestar driblingar á TB/FCS/Royn liðnum.

Stuðlað NSÍ-vikuni hevur Runavíkar kommuna