Salmundur Bech hevur seinastu árini verið millum stóru profilarnar hjá TB/FCS/Royn, TB og FC Suðuroy.

22 ára gamli Salmundur Bech hevur verið partur av U21 landsliðnum onkran dyst. Sum 17 ára gamal spældi hann í 2013 á besta liðnum hjá FC Suðuroy, har hann skoraði næstflest mál (9). Síðani 2015 hevur hann spælt í bestu deildini við FC Suðuroy, TB og TB/FCS/Royn. Í 2016 skoraði hann 8 mál í bestu deildini fyri TB. Í 2017 fekk hann ein skaða, men í 2018 spældi Salmundur í 25 av teimum 27 dystunum hjá TB/FCS/Royn. Samanlagt er Salmundur skrásettur fyri 82 dystir og 15 mál í bestu deildini.

Leitar eftir nýggjum avbjóðingum

Salmundur Bech leitar nú eftir nýggjum avbjóðingum og tí verður hann møguliga ikki at síggja á nøkrum suðuroyarliði komandi ár.

- Eg havi ikki tikið avgerð enn, hvar eg spæli næsta ár. Men eg leiti eftir nýggjum avbjóðingum, um tað so er í Føroyum ella uttanlands, og fái eg møguleikan, so taki eg helst av, sigur Salmundur Bech við bolt.fo. Hann hevur tó ikki tosað við nakað annað føroyskt felag enn.

Hjá TB/FCS/Royn skrivaðu vit um fyri nøkrum vikum síðani, at Búi Egilsson, ið hevði flest málstig í ár fyri TB/FCS/Royn, var opin fyri at skifta felag til næsta ár. Sí grein niðanfyri.